Nongpoh, Rymphang 01: Hadien ka jingtip kaba bñiah halor ka jingdon jong ki nongkhaïi drok, kiba dang thmu ban shalan, ki Pulit jong ka Ri-Bhoi hynne ka step phyrngap kila pynlong ka jingpynap shrip bad ioh bat ïa kawei ka kali Alto (ML 05 E 0804) ha Umran, Ri-Bhoi bad ioh kem 4 ngut ki briew ryngkat u drok Heroine bala ioh kurup na katei ka kali.
Katkum ka khubor bala ioh lum la ioh jingtip ruh ba ki pulit kila ioh bat ïa katei ka kali haka por 3:30 baje mynstep ha Umran bad haka jingtalasi ïa katei ka kali bad ka met ong ki la ioh ban kurup ïa u Drok Heroine ba don kumba 66 gram bad 34 hajar ka pisa.
Na ka liang ki pulit kila pyndep ïaka kamram katkum ka NDPS Act bad kem noh ïa kitei ki 4 ngut ba kynthup ïa u Klevin Malngiang na Mawlai u ba ñiah ïa katei ka kali, u Frederick Ryntathiang na Pynthor, u Bankit Marbaniang na Lumshyiap Golflink bad u Shanbor Rani na Nongmynsong bad ka jingtohkit ïaki ka dang ïaid shakhmat.
