Khliehriat, Naitung 7: Ki pulit ANTF jong ka East Jaiñtia Hills District ha ryngkat ka jingiatreilang bad ki pulit jong ka Umtyra Infiltration Check Post, hapoh ka jingialam u Additional Superintendent of Police East Jaiñtia Hills District, u bah Banlamphrang Jyrwa bad u DSP East Jaiñtia Hills District, u bah Jason Myrom, mynta ka sngi ki la ioh ban kurup ïa u drok herion 72 gram bad 17 strip u dawai kuli Nitrazapam, ha kaba iadei bad kane ki pulit ki la kem noh ar ngut kiba don kti kiba la tip kyrteng kum u Heirtami Dkhar, 29 snem kyrta, uba na ka shnong Madanpatieñ Ïalong, West Jaiñtia Hills District bad u Rajen Pale, 25 snem kyrta, uba na ka shnong Lumpyrtuh, Mih myntdu, West Jaiñtia Hills District.
Kitei ki ar ngut kiba kit ia ki drok, ki la buhrieh ruh ïa ki drok herion ha ka met jong ki ha ki jaiñ ba ki phong bad ki pulit ki la lap ïa kine na ka met jong ki katba ïa ki dawai kuli Nitrazapam pat la lap na ka kali, ki pulit ki la kurup noh ruh ar tylli ki mobile phone bad ïa ka kali ba ki pyndonkam.
Ki khubor na ki pulit ki iathuh ba hadien ba ki la ioh jingtip kaba tikna ba ki don kiba kit ïa ki drok na Silchar bad thmu ban pynpoi sha Shillong kumta ki pulit ki la khangkdong bad kitei ki ar ngut kiba don kti ki la ngat ha ka shrip jong ki pulit, la ong ruh ba kitei ki ar ngut kiba don kti ki la pyndonkam da kawei ka kali maruti zen kaba don u registration number WB 02 P 2867.
La ong shuh shuh ruh ba ka jingpynap ktem ki pulit ka long haduh khat san kynta bad ka la shimpor slem haduh katne dei na ka daw ka jingjur palat ka jingdheng kali ha ki thaiñ Malidor.
Kum ban shu phai dien, dang myn ha ka 30 tarik u jylliew bad kumjuh ruh myn ha ka 3 tarik mynta u bnai naitung ki pulit East Jaiñtia Hills District ryngkat ka jingiatrei lang bad ki pulit jong ka Infiltration Check Post Umtyra ki la ioh kurup shibun ki drok bad kem noh ïa kiba donkti.
La ong ruh ba ka tnat pulit jong ka East Jaiñtia Hills District kan ïai long peitngor beit bad kan duriap ban ïakhun tyngeh ban rat diengkhong ïa u drok, kumba ka tnat pulit ka ju pynlong ïa ki awareness prokram na ka por sha ka por, kane kan nym kut tang ha ki prokram awareness hynrei kan ïai trei ruh bad ki kam ban peitngor ban tehlakam ïa u drok uba ju buh jingeh ym tang ïa ki longiïng kiba shah ktah, hynrei u drok u ktah ruh ïa ka shongsuk shongshngaiñ ha ki shnong ki thaw bad ha ka imlang ka sahlang hi baroh kawei.
