Shillong, Jymmang 31: Ka jingong u Dr. Jemino Mawthoh, General Secretary ka UDP bad u Bah Bindo M Lanong, Senior Adviser ka Seng ba ka UDP kam kwah ban weng na ka sorkar MDA, ïoh ba ka wan ka President’s Rule, ka la pynlyngngoh ïa kiba bun. Ka daw ka long ha ka UDP ka don tang 9 ngut ki MLA ha ka ïingdorbar kaba don 60 ngut ki MLA.
Katto katne ngut ki nongïalam ka NPP, ki la ong ba ha ka sorkar MDA don haduh 48 ngut ki MLA, kynthup 23 ngut na ka NPP, 9 ngut na ka UDP, kynthup ia uwei u Associate Member, 4 ngut na ka PDF, 2 ngut na ka HSPDP, 2 ngut na ka BJP, 1 na ka NCP, nalor ki 5 ngut ki Congress bad uwei u Independent.
Ha ka Liang Pyrshah ki don tang 12 ngut ki MLA jong ka All India Trinamool Congress.
Ki nongïalam ka NPP ki ong ba lada ka UDP ka mih noh na ka MDA, kaba mut ka MDA ka dang sah hi sa 39 ngut ki MLA. Shuh shuh ki la ong ba lada ka HSPDP kaba don lang bad ka UDP ha ka Regional Democratic Alliance (RDA) ruh ki weng noh dang sah hi sa 37 ngut ki MLA ha ka MDA. Lada weng sa ka PDF kaba don saw ngut ruh dang dah sah sa 33 ngut. Wat lada weng sa ka BJP kaba don 2 ngut ruh dang sah sa 31 ngut, kaba dei ka jingbun briew ne ka majority ban ïoh synshar ha ka jylla.
Ha ka jingïalang kaba la long ha Jowai ha ka sngi Saitjaiñ, u Dr. Jemino Mawthoh, General Secretary ka UDP, u la ong ba ka UDP kam kwah ban weng na ka sorkar MDA, ïoh ba ka sorkar ka khyllem bad kan wan ka jingsynshar President kaba long ka jingma kaba khraw ïa ka jylla.
Na ka liang u Bah Prestone Tynsong, National Vice President ka NPP, u la ong beiñ ïa ka UDP ba ka tieng ïa ka President’s Rule, kaba dei kaba la buh da ka riti synshar jong ka ri India. “Balei ym tieng ïa ka President’s Rule haba phi lap ba ka jingsynshar ka MDA ba ïalam da ka NPP ka long kaba sniew”, la ong u Myntri Rangbah Symbud jong ka jylla.
Kine ki nongïalam ka NPP, ki la ong ba kane ka jingkren ki katto katne ki nongïalam ka UDP kadei tang ka jingpynbieit paidbah namar ba la jan ka elekshon bad kim kwah ban ngat lang ha kino kino ki jingshah kynnoh lada jia ba ki paidbah ki kynnoh ïa ka sorkar MDA.
“Saw snem phi la don lang bad ngi ha ka sorkar, wat mut phin lait lada ka sorkar ka shah kynnoh eiei”, la ong kine ki nongïalam jong ka Seng ba ïalam ïa ka sorkar MDA.
