Kat shaba phai bad ha man la ki seng saiñ pyrthei naduh ka BJP haduh ka NPP bad ka UDP, baroh ki ïa long hi kumjuh. Ha man la ka seng ki don ki MLA/MDC kiba pyndonkam bakla ïa ka kyrdan lajong. Imat ki tharai ba haba ki don ha ka bor, kim donkam ban bud shuh ïa ki aiñ. Ki tharai ba ka aiñ ka dei ban trei kam tang na ka bynta ki thab ki dab bad ki riew paidbah kum mangi baroh. Ha ka taiew ba la dep ki pulit ki la kem ïa u Vice President ka seng BJP ha ka jylla – u Bernard Marak uba la long teng u nongialam seng lehnoh, kieng atiar. Kaba phylla ha kane ka jylla ka long ba ki briew kiba la ïaid palat aiñ bad kiba long ka kai-khlaw kiba dawa pisa jubor bad kiba shim ruh ia ka jingim briew, ynda haba kim sngew lah shan shuh ban im ka jingim kai-khlaw ki leh mynleh ban pyndem wait (surrender) hynrei khlem da aiti lut ki tiar siat kum ki suloi bad kiwei kiwei ki tiar pynmynsaw.
Lada ïa ki nongtuh kiba tuh tang ïa ki tiar barit baria ruh ka jingpynshitom ha phatok ka long kaba slem bha, hynrei ïa ki kai-khlaw pat la shu map ei (general amnesty) khlem kano kano ka jingpynshitom. Balei keiñ ba ka pyrla ka noh shiliang haduh katne? Ym tang katta, kine ki kai khlaw ynda ki la pyndem wait ki sa rung syndon sha ki seng saiñ pyrthei bad ki ïaleh elekshon. Ki paidbah ruh khlem da pyrkhat jngai ki rai pynjop ïa ki. Hato kumno ngi ïa rai ban pynjop ïa ki briew kiba lah ïaid palat aiñ? Bad kumno hi ruh ngi khmih lynti ba kin ïaid beit, ïaid bha bad ba kin ym phai shuh sha ka rukom im barim jong ki?
Haba ki kai-khlaw (militants) ki pyndem wait (surrender) ki dei ban ïaid lyngba katto katne ki kyndon bad ban shah sneng, shah kraw bad ban da peit bniah bha ïa ki da ki nongsumar jabieng (psychologist/psychiatrist), namar ba haba ki im ha khlaw kum ki kai-khlaw ka rukom pyrkhat jong ki kam ïahap shuh bad kiwei ki para briew kiba bat ïa ka aiñ. Ka shim por ïa kum kita ki briew kiba la pynkheiñ ïa ka aiñ ba kin mlien ban ïaid pat katkum ka aiñ.
Ym don ba kylli kumno u Bernard Marak u Vice President ka BJP ha ka jylla u ïoh ïa ka spah ka phew ban tei ïa ka ïing paki dulan ha Tura ïa kaba u pynïaid kum ka kynja jaka sah ki nongwan jngoh kai pyrthei (resort), hynrei ïa kaba ka ujor da ki pulit ba ka long kum ka jaka ha kaba la ai lad ïa ki samla kynthei bad shynrang ba kin ïa dih ia bam bad ïaleh sngewbha khlem kano kano ka jingadkar. Ki don ruh ki jingmudui ba ïa ki khynnah kynthei kiba dang kham rit ka ka rta lah set hangta ha ïing bad la pynleh ïa ki kam kiba shyrkhei. Haba ki don kum kita ki jingmudui da ki bahaïing ha sem jong kita ki khynnah rit hato ki pulit kim dei ban wad bniah bad tohkit kaei kaba don sha lyndet jong kine kiei kiei? Hynrei kaba phylla ka long ba ka seng BJP ha ka jylla ka ïada rap-jot pynban ïa une u nongïalam jong ka uba dei ruh u MDC jong ka Tura. Ka jingkynnoh ka long ba u Chief Minister Conrad Sangma u la sheptieng eh ban ïakhun pyrshah bad u Bernard Marak ha ka elekshon ka ban wan ha u snem 2023 Rymphang. La kynnoh ruh ba u Conrad Sangma u la pyndonkam ïa u DC bad u SP ka West Garo Hills ban tei pop halor u Bernard Marak.
Ka long ka jingshisha ba u Bernard Marak u la wad ïa shibun ki jingduna bad jingbakla jong kane ka sorkar MDA kaba ïalam khmat da u Conrad Sangma. Baroh ngi kubur ïa kane ka jingkynnoh namar ngi ïohi bad ïohsngew jan man la ka sngi ba ka don kano re kano ka jingleh bymhok, lane ka jingsynshar bymhok. Ka don ka jingkynnoh ba ka MeECL ka la shu wanrah ïa ki kompeni ban lum ïa ka bai siew bording elektrik khlem da ïaid lyngba ki lad kiba dei bad kiba shai (open tender). La shu jied beit tang ïa kawei ka kompeni bar jylla. Shuwa ïa kata ruh ki la don bun ki kynrum kynram ha ka MeECL ha kaba la ai ia ka tender ban pyntrei kam ïa kita ki smart meter ha kawei ka kompeni kaba ïajan bad u Minister ka bording elektrik (power) uba mynshuwa, u James Sangma.
Nalor kata dang bun shuh shuh ki jingjia kiba kdew ïa ka jingdkoh trei kam kane ka sorkar MDA bad ka jingbamsap ruh ha kiba bun ki tnad trei kam. Don ki jingkynnoh ba wat ha ka por ba baroh ngi dang ïaleh pyrshah ia ka khlam Covid, ki don kiba dei peit ïa ka tnad ka koit ka khiah kiba shna pisa pynban ban pynriewspah ïalade shimet. Lada lah ban tih ïa kine ki jingkynnoh iwei hadien iwei te lah ban lap ïa ka jingbam sap kaba da ki spah klur tyngka. Halor kane ngi dei ban ai jingïaroh ïa ka seng Hynniewtrep Youth Council (HYC) kaba la tih ïa shibun ki kynrum kynram ha kane ka sorkar lyngba ka lad wad jingtip (Right to Information). Kane keiñ ka dei ka lynti ba ki seng bhalang ki dei ban ïaid khnang ban wanrah ïa ka synshar ka khadar kaba khuid bad khnang ba ka pisa paidbah (public money) kan leit sha ki kam pynroi (development) ym sha ka ban pynkiew spah ki minister ïalade shimet.
Ka jingleh u Bernard Marak ka BJP ban thwet ïa ki jingduna ha ka kam synshar-khadar ha ka Garo Hills District Council ka long kaba dei eh. Hynrei ar tylli ki jingbakla kim lah ban wanrah ïa ka jingïaidbeit, ïaid ryntih (kumba ong ha ka ktien phareng – two wrongs don’t make a right). Donkam ban pynrem ïa u Conrad Sangma na ka South Tura constituency lada la shem ba u la ïaid palat pud ha ka ban pynïaid ïa kane ka sorkar. Hynrei ha kajuh ka por ïa u Bernard Marak ruh dei ban ai lad ïa ka aiñ ba kan tohkit bha bad ai ïa ka rai jong ka halor ki kam ba la kynnoh ba u lah leh. Baroh ngi long kumjuh hakhmat ka aiñ. Ym don uba heh ne bakhraw. Baroh ngi shah bishar da kijuh hi ki aiñ. Te ngi dei ban ai lad ïa ka ain ba kan trei ïa la ka jong ka kam.
Lada ki paidbah nongjied ki long kiba stad bad ba shemphang ki la dei ban kyntait noh shisyndon ïa kine ki ‘minister’ ka sorkar MDA kiba la shah kynnoh ba kim lerkam bad ba ki bam sap khlem da salia shuh tang ban tep eit miaw ruh. Lada ki paidbah nongjied ki kmen toh-hoh ïa ka pisa kaba katto katne ki kynrem ki lyndan ki ban ïaleh elekshon kum na ka Nongkrem konstituwensi, kiba lah sdang sam, te ka jingjot ka ap ïangi bad ïa ki pateng ba hadien jongngi.
