Kumno ki MLA ki nangïoh thiah, haba ki nonghikai ki thiah ha surok: Adelbert

Shillong, Jylliew 30: U Bah Adelbert Nongrum, MLA jong ka North Shillong, u la ther tyngeh ïa ki nongmihkhmat kiba bat ïa u lakam synshar ha ka jylla, da kaba ong kumno ki nang ban ïoh thiah suk, katba ki nonghikai pat ki hap ban thiah ha surok na ka bynta ban ïoh ïa ka tulop jong ki.
U MLA ka KHNAM, uba bunsien um ju tyngkai ïa ki kyntien ban ther ïa ka sorkar, wat lada ïalade u don ha ka liang synshar, u la leit jngoh ïa ki nonghikai hynnin ka miet, kaba dei ka miet kaba ar ba ki sah ha footpath mar pyrshah ïa ka Secreteriat, u la ong ba u pang ka mynsiem ban ïohi ba ki nonghikai ki hap ban sahmiet ha surok.
“Kiba bun na kine ki nonghikai kidei ki longkmie, ki longkmie kiba kha ba pun, ki longkmie kiba don khun rit ha ïing bad ki nonghikai kiba hap ban peit ïa ka jingnang jingstad ki khynnah. Shano ka lawei jong ki kan poi lada ki nonghikai kin sahmiet ha surok”, la ong u Bah Adelbert.
Da kaba kyrshan ïa ka jingïakhih ki nonghikai, u MLA u la ong ba dei ka sorkar hi kaba la kular ban peit ïa ki jingeh jong ki, ha kaba u Myntri Rangbah u la ong ba ka Cabinet kan sa shong ban pyrkhat. Hynrei wat haduh lai tylli ki Cabinet ki la shong ruh, pynban kim shym la lah ban leh eiei ïa ki jingdawa jong ki. “Kane ka pynpaw ba ki la thok la shukor ïa ki nonghikai bapli”, u la ong.
Na ka liang jong u, u la kyntu ïa ka sorkar ba kan shimkhia ïa kane ka jingeh jong ki nonghikai, khamtam ïa u Myntri ka tnad pule puthi ka jylla, u Bah Lahkmen Rymbui ba um dei ban da ap hukum nano nano ban weng ïa kane ka jingeh, lym kumta udei ka bha ba un hiar shuki noh.
DA KA WHITE PAPER DAWA KA VPP
Ha kajuh ka por ka Seng Voice of the People Party (VPP) ka la dawa ba ka sorkar kadei ban ai da ka jingthoh kaba shai lane ka white paper kumno kan leh ban weng syndon ïa kane ka jingeh ba ki nonghikai ki ïakynduh.
Ha ka kyrwoh ba la phah da u Dr. Ricky AJ Syngkon, General Secretary, ka Seng ka pynpaw ka jingsngewkhia kaba jur halor ka jingleh ïa ki nonghikai kaba la long ka jingleh beiñ bad ñiew beiñ ïa ki haduh ba kin hap mih ban thiah wat ha surok ruh. “Kane ka jingleh ka sorkar kan pynduh ïa ka burom jong ka jylla, khamtam ka nongbah Shillong kum kata ka pneh jong ka pule puthi”, la ong u Dr. Syngkon.
U la ong ruh ba kane ka jingmih ïakhih ki nonghikai kadei ka jingpulom ka jingtreikam ka sorkar u Conrad Sangma, kaba ju kop na ka por sha ka por ban pynbha ïa ka pule dangle ha ka jylla.
Ha kajuh ka por ka Seng ka ai ka jingkyrshan kaba khlaiñ na ka bynta ki Nonghikai Adhoc ha ka jingïakhih bad dawa ba ka sorkar kadei ban weng shisyndon ïa ka jingeh jong ki.