Kumno ka sorkar kan leh ïa ka jingjaboh ka lyer ha Byrnihat

Nongpoh, Rymphang 16: Ka jingjaboh jong la lyer haka thaiñ Byrnihat naka jingjur ka tdem ba pynmih naki karkhana kala wanrah ka jingeh kaba khraw ïa kiba bun ki shnong ba marjan haduh ba ka tdem jaboh kam dei shuh tang kaba ma ban ring mynsiem hynrei kala sop ruh naduh ki jingthung jingtep bad ki iing ki sem ba haduh kim don jaka shuh wat tang ban thad jaiñ bad ban bam ban dih namar ka suiñ bneng lah ban sakhi ba ka shu dum lynter ha kitei ki thaiñ naka jingrben jong ka tdem jaboh.
Lah ruh ban kdew hangne ba ki paidbah ka thaiñ Byrnihat naka por shaka por ki lynñiar ki ud ki nam halor jingher ki tdem jaboh kiba iong ngaiñ kum ki pui pui sha ki iing ki sem, ki jingthung jingtep bad wat ban sar phyllaw mynstep ki hap ban sar ïaka tdem kaba iong ngaiñ kaba her nakitei ki karkhana bad dang shen kla pynlong ïaki paidbah ban mih surok ryngkat ki placard wat ban leit khang khyrdep ïa kawei ka karkhana haka shnong Harlibagan ryngkat ka jingbyrngem ban leh eiei lada ki bor ba dei peit kim shimkhia ïa kiwei kiwei ki karkhana ha katei ka thaiñ.
Ka jingmih ka tdem jaboh ha ka thaiñ Byrnihat kam dei tang naka jylla Meghalaya hynrei shibun ki karkhana ki don ruh haka liang jong ka jylla Assam kaba don mar syndah bad ka Meghalaya bad kane kala buh ka jingeh kaba khraw lada ki ar sorkar kim ïatreilang ban pynduna ïaka lyer jaboh kaba la syrtap ha katei ka thaiñ haduh ba ki paidbah ki ud bad lynniar ba kumno ka sorkar kan shimkhia ïa kane ka mat bad sa katno ki paidbah kin dang hap ban im hapdeng ka jingsyrtok ba ki hap ban ring mynsiem bad ban im hapdeng ka jingjaboh jong ka lyer.
Ka jingjur ka tdem jaboh haka thaiñ Byrnihat kala pynlong ruh ïaka tnad Meghalaya Pollution Control Board ban don hapdeng ka jingïaleh bad ka jingeh kaba khraw namar ki jingshah kynthoh ba lai phew jait halor ka jingshimkhia jong ki tang na shuki khlem da iohi ïaka jingeh ki paidbah bad kiba shu leit shu wan khlem da pynlong ka jingwad bñiah bad ka jingtohkit.
Hadien ka jingmih khubor ha u snem bala dep halor ka jingiohnam ka thaiñ Byrnihat kaba jaboh tam haka pyrthei bun tylli ki karkhana kila shah khang khyrdep bad shah daiñ kuna hynrei haduh mynta ki paidbah ki dang mad kajuh ka jingeh naka jingrben jong ka tdem pui pui kaba sop ïaki iing ki sem bad wat ki jingthung ki bit da kitei ki tdem jaboh ba rben kaba long ka jingma kaba khraw lada ki bam ïa kitei ki jhur bad ki jingthung jingtep bad don ruh kiba la ud pang bad don hapdeng ka jingshitom.
Namarkata ka sorkar kala dei ban shimkhia da kaba tyngeh pyrshah ïaki karkhana kiba pynkheiñ aiñ kiba jur ka jingpynmih tdem khamtam haka por mynstep bad mynmiet kumba la ïathuh da ki paidbah ba sah marjan kitei ki karkhana.