Jowai, Nailar, 20 : Ka PM SHRI School Jawahar Navodaya Vidyalaya West Jaiñtia Hills, kaba la pynïaid da ka Navodaya Vidyalaya Samiti, Noida hynnin ka sngi ka la pynlong ïa ka prokram “27th Vidyalaya Level Youth Parliament Program (Vidyalaya Level) ha ryngkat ka jingwan ïashim bynta shitrhem jong ki khynnah skul bad ki nongtrei.
La pynlong ïa kane ka prokram ka long shi bynta ban ai jinghikai shaphang ka jingtip sha ki khynnah pule ba kin tip khambniah shapang ka rukom jong ka synshar paidbah, ka akor ka burom ha ka Dorbar thawaiñ bad ka jinglong nongïalam.
U MLA ka Jowai Bah Wailadmiki Shylla, MLA ula long kum u kongsan ha kane ka sngi, haba ai jingkren ula ai khublei ïa ka jingpyrshang jong kane ka skul ban ai jingtip sha ki khynnah shaphang ka saiñ hima sima bad kiba don jingkitkhlieh kum ki nongshong shnong. Ula pynshlur ïa ki khynnah pule ban long kiba shitrhem ha ka synshar paidbah bad ban bat beit ïa ki jinglong ba la buh ha ka riti synshar ka ri India.
Kiwei de ki riew kongsan kiba wan ban donlang ki kynthup ïa u ma S. K. Lato, Vice President Rotary Club Jowai & President Jaiñtia Tourism & Environment Society bad u Dr. R. K. Saini, Principal, JNV East Jaiñtia Hills, haba ai jingkren baroh arngut ki la pynpaw ka jingïaroh ïa ki khynnah pule kiba la pynpaw ïa ki sap ki phong ba ki don ha kane ka prokram kaba ïadei bad ka saiñ hima sima bad ki la kyntu shuh shuh ban don kum kine ki rynsan ban pynwan dur ïa ki samla na ka bynta ban long ki nongïalam jong ka lawei.
Katba u Neeraj Kumar uba dei u Principal jong ka skul PM SHRI JNV West Jaiñtia Hills ula pynpaw ka jingsngewnguh ïa baroh ki nongwan ïashim bynta naduh ki nonghikai bad ki khynnah skul kiba la pynlong ïa ka prokram kaba itynnad bad kaba jop.
