Shillong, Naiwieng 18: U Myntri Rangbah ka jylla u Conrad K Sangma ha ka sngi Nyngkong u la plie ïa ka 4th Edition jong ka Shillong Literary Festival ha Ward’s Lake, Shillong bad u la pynbna ruh ba ka sorkar kan pynlut haduh T. 4000 klur ban kyntiew ïa ki kam karkhana jong ki kam jngohkai pyrthei na kane ka jylla.
Kane ka prokram ka la long kaba iphuh iphieng da ka jingïashim bynta jong kiba bun ki nongthoh kot kum Jackie Collins of India, Shobhaa De bad Indian Novelist bad Poet Vikram Seth ba dei ruh ba la ïoh ïa Padma Shri bad kiwei ki khusnam.
Ha ka jingkren plie jong u na ka liang u Myntri Rangbah u la ong ba ka sorkar kan pynlut haduh T. 4000 klur na ka bynta ban kyntiew ïa ki jingtei ha kaba ïadei bad ki kam jngohkai pyrthei kiba kynthup ïa ki hotel, home-stay, bad kiwei kiwei.
U la ong ruh ba ka jingthmu jong kane ka literary festival ka long ban wanrah lang ïa ki nongthoh kot bad ban pynïoh ïa ka rynsan ïa ki briew kiba don ïa kane ka mon bad kumjuh ruh ïa kiba don ka sap ha ka thoh ka tar bad ban pynshlur ïa ki ba kin sam ïa ki kam jong ki ha ki rukom bapher bapher.
U la ong ruh ba kane kan ai ka lad ïa ki nongthoh kot na ka jylla ba kin ïoh ban pynpaw ïa la ki jong ki sap bad ki jingmut lyngba ki rynsan thoh kot ha kane ka jylla bad kumjuh ruh ha ka ri baroh kawei bad kumjuh ruh ha ka pyrthei.
U la ong ruh ba sa kawei pat ka jingthmu jong kane ka festival ka long ban pynshlur ha ka kam pule bad thoh ïa ki nongshong shnong.
“Ngi la banjur ïa ki skul ba kin shim bynta ha kane ka tamasa ha ki rukom bapher bapher da ki rukom thoh ne pule jong ki,” u la ong.
U la ong ruh ba ka jylla watla ka don duna ki nongshong shnong hynrei yn pyrshang ban pynshlur halor kane ka kam pule bad ka kam thoh kot ka ban ïarap ïa ki samla jong ka jylla.
Na ka liang jong u ula ong ruh ba kane ka kam thoh bad pule kan ïarap ruh ban pynneh ïa ka jingriewspah jong ka kolshor ki nongshong shnong jong ka jylla.
Ula ong ba kane kan long ruh ban pynkhlaiñ ïa ka CM’s Scholars Program ha kaba ka jylla ka ai ka jingkyrshan ïa kumba 50 ngut ki research scholar ki ban leh ïa ki kam wadbniah bapher bapher ha kaba ïadei bad ka jylla Meghalaya.
