Shillong, Risaw 07: Ka Sorkar jylla ka donkam ban pynlut ka pisa kumba T. 300 klur ban kyntiew ïa ka tulop jong palat 13,000 ngut ki nonghikai Samagra Shiksha Abhiyan (SSA) ha ka jylla Meghalaya.
Katkum ka tyllong khubor ba la ïoh na ki heh ophisar la ïathuh ba ka sorkar ïa mynta ka la hap ban pynlut kumba T. 366.05 klur manla ka snem na ka bynta ka tulop grant-in-aid ïa ki nonghikai Samagra Shiksha.
Na kane ka T. 132.86 klur ba la pynlut na ka bynta ka tulop jong ki 5814 ngut ki nonghikai lower primary, T. 165.42 klur la pynlut ban siew ïa ki nonghikai upper primary bad T. 20.16 klur na ka bynta ki 576 ngut ki nonghikai secondary nalor T. 47.60 klur na ka bynta ki 1549 ngut ki administration staff.
“Namar kata ngi dang donkam ka pisa na ka bynta kane ka kam sa T. 366 klur ban pyntreikam ïa kane ka jingtyrwa ban kyntiew ïa ka tulop jong ki 13,116 ngut ki nonghikai SSA ha ka jylla,” ong ka tyllong khubor.
Ha u taïew ba la dep, u Commissioner & Secretary ba khmih ïa ka Education u Vijay Mantri u la pyntip ba ka sorkar jylla ka dang khmih bniah ïa ka jingdawa ban kyntiew tulop bad ban pynskhem ïa ki kam shakri jong ki nonghikai SSA ha Meghalaya.
“Ngi khmih bniah na baroh ki liang. Ngi dang ïasyllok bad ka Ministry of Education, ka sorkar pdeng,” u la ong da kaba bynrap, “Ngin sa lah ban ai ka jubab tat haduh ba la pyndep ïa kine ki kam baroh kiba lah ban pyndep ha une u taïew ba khatduh une u bnai.”
Ha kawei pat ka liang, la ïohi ba ka don ka jingïapait hapdeng ki nonghikai SSA.
Katba ka Meghalaya Sarva Shiksha Abhiyan Schools’ Association (MSSASA) ka la aipor 2 bnai ïa ka sorkar jylla ban wanrah ïa ki rukom treikam na ka bynta ban pynskhem ïa ki kam jong ki nonghikai SSA, kawei pat ka kynhun hapoh ka lama jong ka All Meghalaya SSA School Teachers Association (AMSSASTA) ka la sdang ïa ka jingshong kyllaiñ myngor ban dawa ka jingpynkiew tulop kaba 100 percent na ka bynta ki nonghikai SSA.
