Kumba phi pynjop ïa ka Kong Santa, jied ïa nga ruh mynta ka kynti : Hambertus Nongtdu
Khliehriat, Rymphang, 18: U Bah Hambertus Nongtdu uba dei u kyrtong jong ka NPP na Sutnga Nongkhlieh Constituency, u la kyntu ïa ki paidbah jong ka shnong Tluh bad na ki shnong ba marjan ba kin jied ïa u kum u MDC sha Jaiñtia Hills Autonomous District Council (JHADC) ba kan kham pynsuk ka rukom treikam.
“Ka MLA Kong Santa Mary Shylla ruh kaba ki la pynjop ka dei na ka NPP bad kan kham suk ïa nga ban ïakren ban wanrah ïa ka roi ka par ha ki shnong ki thaw bad ka Sorkar kaba lam khmat hapoh ka jylla ruh ka dei ka NPP. Nga kular ba lada nga poi sha ka thong ngan long kum u ksiang ban wanrah ïa ka roi ka par ha ki shnong ki thaw,” ong u Bah Nongtdu.
U Bah Nongtdu u la kyntu ïa ki paidbah ba ki dei ban da pyrkhat sani bha namar ha JHADC ki dang don haduh saw spah tylli ki kam kiba dang lait mynta. U la kular ba lada u poi sha ka thong un ïarap ïa ki samla wad kam.
“Pyrkhat sani ïa kane ka kam namar ha kane ka juk katne ki khun kiba la biang ka jingnang jingstad ngan ïathuh ïa phi ba ki don haduh saw spah tylli ki kam kiba dang thylli ha JHADC. Ka EC ha kine ki snem ba la leit ka la don hapdeng ka jingkyrduh pisa malula kumta ka la rai noh ba ïa kine ki saw spah tylli ki post ym pat long ban thung briew. Kumta nga ong ïa phi da kaba shai ba kine ki post kiba dang lait ha kine ki aiom treikam ki ban sa wan sngewbha wat shah ïalam bakla ha kiwei, namar lada phi ailad phi ïa nga ha kane ka kynti ban long kum u MDC kumba nga la long teng kum u CEM mynshwa ha JHADC nga don ka hok ba ngan ïasaid na ka bynta kine ki kam kiba dang lait bad la kumno kumno 200 tylli kin wan sha kane ka district jong ngi bad lada phi phah da kiwei pat ki nongmihkhmat phi sa bishar hi da lade ïa lade,” ong u Bah Nongtdu.
Shuh shuh la ong ïa ki paidbah ba kim dei ban sngewthuh bakla bad ban pynsep ei ïa ka vote ban shu ai sha ki party ki bym don shuh ka bor naduh jylla haduh Disctrct Council.
“Ka Congress mynta ka la jan ïap bad ka la don ha ICU, nga ong ïa phi im ruh kan ym im hi lah tikna beit ba ka la ïap, kumta lada jied ïa u kyrtong Congress nga bad phi ngin sa babe namar ba la bakla ban jied. Kum ki nongthep vote ailad ïa nga u kyrtong ka NPP kumba phi la jied ïa ka kyrtong NPP ha ka election MLA, ka kong Santa Mary Shylla,” la bynrap u Bah Nongtdu.