Kumba la kren ha Ïing Dorbar kan long ruh kumta; ka casino la dep pynsahngeh: Conrad

Shillong, Nailur 29 : U Myntri Rangbah ka jylla u Conrad K Sangma u la ong ba ki paidbah kim dei ban dang don kano kano ka jingsngew artatien ha kaba ïadei bad ka Casino namar na ka liang ka sorkar ka la rai ba kan ym ïaid shuh shakhmat hadien ba ka mih ka jingsngew pyrshah na kiba bun ki liang.
Haba kren sha ki lad pathai khubor u Myntri rangbah u la ong “Kumba ng la kren ha ka ïing Dorbar ba ka sorkar kan ym ïaid shuh shakhmat bad lar ai ban khang noh ïa ka Casino kan long shisha ruh kumta. Ki paidbah kim dei ban dang sngew ar tatien eiei namar kaei kaba kum u Myntri rangbah ka jylla u la kren ha ka Ïing Dorbar kam dei tang kaba kren biria” u la ong.
U la ïathuh ruh ki licence casino kiba ka sorkar ka la ai ka la kut noh mynta ka 29 tarik bad na kata ka daw ïa ka casino ngin ym ïaid shuh sha khmat khlem da ïoh ka jingmynjur na u paidbah .
“Ki don kiba pan licence hynrei kumba ngi la rai ban ym ïaid shuh sha khmat ïa ka jingplie casino ngim shym la ai licence shuh ïa kine kiba pan” u la bynrap
Haba kren halor ka jingmih ki jingdawa ban pyndam noh ïa ka Meghalaya Regulation Gaming Act na ka liang u Myntri Rangah u la ong ba ka sorkar hi kan ym pyndam satia ïa kane ka aiñ namar ka jingthmu ka sorkar ban wanrah ïa kane ka aiñ ka long ban teh lakam ïa ki kam khalai la ki dei ka online ne offline.
“Dei lyngba ka jingdon kane ka aiñ yn lah ban teh lakam ïa ki jaka ïa khalai baroh” u la ong
Haba jubab la ka sorkar kan pynkylla thymmai ne amend ïa kane ka aiñ u Myntri Rangbah u la ong ba ka sorkar kumba long mynta kan ym pynkylla satia hynrei lada don kiba kwah ban ai jingmut na ka liang ka sorkar ka long kaba la kloi ban pdiang ïa kata.
Ka Khasi Jaiñtia Church Leader’s Forum (KJCLF) ka la ïaroh ïa ka jingkloi jong u Myntri Rangbah ka Jylla ban sngap ïa ka jingpynsngew jong ki paidbah kynthup ïa ki kynhun bapher bad nongïalam Balang kumba la ïai pynpaw na ka por sha ka por ban pynsangeh noh ka jingshna ïa ka Casino.
Ka Forum ka la phah ruh da ka jingthoh ha ka sngi Palei sha u Myntri Rangbah ban pynsngew ïa ka jingdawa ban pynsangeh noh ïa ka ktem jingkhalai Casino bad ban pyndam noh ïa ka Meghalaya Regulation of Gaming Act, 2021.
“Pynban, ha ka jingbuddien ïa kiei kiei kiba la jia ha ka Dorbar Synrai jong ka Iingdorbar Thaw Aiñ kaba dang shu kut shen ha kine ki khyndiat sngi, ka Forum ka ïohi ba kam shym don kano kano ka jingkut jingmut kaba skhem jong kane ka Sorkar ba mynta ban pynsangeh ïa ka ktem khalai Casino bad ban pyndam noh ïa ka Meghalaya Regulation of Gaming Act 2021. Ki jingshisha bad ki kam kiba paw sha ki paidbah ki long da kumwei pat,” la kynthoh ka Forum lyngba u kyrwoh ba la phah da u Secretary u Rev. EH Kharkongor.
“Da ka jingsngewkhia kaba khraw halor kine kiei kiei ka KJCLF ka ïai bteng ban kyntu bad dawa ïa ka jingpynsangeh noh ïa ka ktem khalai Casino bad ban pyndam noh ïa ka Meghalaya Regulation of Gaming Act 2021,” ong u kyrwoh.