Kumba khynñiuh jumai twa khyndew na u lum ha shnong Lumpyngngad-Karkhana

Jowai, Jylliew 19: Ka jingther u lapbah lapsan ha kine ki sngi ba ladep ka la wanrah ïa ka jingtwa khyndew kaba shyrkhei bha ha ka sngi u Blei ha ka por kumba 2:30 baje mynstep ha ka shnong Lumpyngngad-Karkhana
La sakhi ïa kane ka jingjia da ki nongsah miet sha ki Bri kiba ïathuh ba ka jingtwa khyndew ka long kaba jur bha bad kaba long thik kumba khynñiuh u jumai bah watla ki sah kham pajih na ka jaka ba la jia ka jingtwa khyndew.
Ka jingjulor na kane ka jingtwa jong u lum ka long shaba palat, kaba ym lah shuh ban batai ne ai ki jingkheiñ. Ki dieng kwai da ki phew hajar tylli ki la khyllem bad shah ban ha ka khyndew nalor u tympew, u synsar bad kiwei ki marrep ym ïohi shuh ïa ka dur jong ki na ka jingtuid khyndew bad shah ban.
Ka kyrteng ka jaka kaba kine ki nongrep ki thung ki tep ka long ka ‘thaw sngam’ kaba hap hapoh ka jingpeit u Dolloi Elaka Satpator kaba don marjan bad ka shnong Lumpyngngad bad ka shnong Karkhana.
Ka jingshah ktah na kane ka jingtwa khyndew ka long haduh phra tylli ki longïing, kata, ka kong Embhah Shylla, Kong Damayanti Shylladong, Kong Akordor Lamare, Kong Niti Pamblang, Kong Hiltimai Shylla, Kong Silent Shylla, Kong Nishain Khongmawloh. Kine baroh hynñiew ngut na ka shnong Karkhana bad kawei ka longïing kaba kynthup lang hangne kaba hap ha kajuh ka apot ka long ka Kong Miyo Tangsang na ka shnong Lumpyngngad.
Ha ka jingïakren bad ki katto katne ngut ki trai jaka, ki ong ka jingduh ïa ki jaka rep na ki jinglynshop jong ki bor ka mariang ka long kumba duh ïa u dkhot ka longïing uba khlad syndet ne ïap bym dei por namar ka jingsngewsih kaba khraw bad ka jongïam pait dohnud kaba ym lah shuh ban pyntngen ïa ki dohnud jong ki. Ki ong ba ki im ja kpoh da kaba rep kwai, tympew, sohmarit, synsar, kait, sohtrun bad kiwei.
Ki sngew ba la kut ka lad ïa ki, ki ong ha ki por ba ladep ‘ngi pyndap pynbiang ïa ka ïing ka sem, bsa ïa ki khun ki kti, pynstad pyntip ïa ki da ka jingdon kine ki marrep ha kane ka jaka kaba long ka jingkyrkhu ïa ki hynrei mynta pat da ka jingpynjulor ki bor mariang da ka jingjur palat u lapbah lapsan ka long ka jingduh kaba khraw bad ka la poi sha ka kut lad na ka bynta lashai lashisngi ka ïing ka sem bad ki khun ki kti.
Ki longïing kiba shah ktah bha na kane ka jingtwa khyndew bad baroh ki jingthung jingtep ki la duh lut ki long ka kong Embhah Shylla kong Damayanti Shylladong kong Akordor Lamare kong Miyo Tangsang.
Ki nongrep kiba im ja kpoh na kane ka jaka ba jia, ki ong ba kim ïohlad shuh ban trei da kawei pat ka kam namar lada ki thung bujli da kiwei pat ki jingthung, ka khyndew kam long shuh bad ki don ka jingkyrmen sa tang ban phai sha ki bor Sorkar naduh u MLA, Myntri ka Rep ka Riang, SDO, BDO Amlarem ban ïarap ïa ki ban pynïoh skim ha kaba ïadei bad kane ka jingjia.
Ka jingtwa kane ka khyndew ka la ktah ruh wat ïa ka surok PWD kaba la dap khyndew kaba pynsah kut ïa ka leit ka wan ki Kali ki motor
Ha ka janmiet Lah Sngi u Blei ha ka por 4.30 baje janmiet la don ka puhshilum kaba la dang pynkhuid ïa ka khyndew na kane ka khnang ba ki kali kin ïoh ban leit ban wan bad la ong da kiba sakhi hangta ba lada u slap u dang bteng khlempep kan sa don biang ka jingtuid khyndew na ki bynta ba sha khlieh jong ka surok.
La ong ruh da ki nongrep ha kane ka jaka ka jingjngai na surok PWD sha ka jaka ba twa khyndew ka long kumba 400 mitar eiei.