New Delhi, Naitung, 14: Ka long kaei kaei kaba ai mynsiem bad pynkmen ïa ki nongrep Sohtrun jong ka Jylla da ka jinglah ban pynïaid ïew bha ïa u Sohtrun ha ka tamasa Sohtrun ne ka Pineapple Festival 2024 kaba la pynlong ha ki san sngi lynter ha Nongbah Delhi.
Ïa kane ka tamasa Sohtrun kaba la sdang naduh ka 10 tarik bad kaba la pynkut noh ha ka sngi U Blei ka 14 tarik Naitung 2024 ha Dilli Haat, New Delhi ha kaba u Myntri Rangbah ka Jylla u Conrad K Sangma dalade u la wan ban sakhi lang ha kane ka sngi kut, da kaba ïoh ruh ban ïakren bad ki nongrep, ki nongseng kam bad ki nongkhaïi.
Katkum ka jingïohlum jingtip la ïathuh ba ha kane ka tamasa kaba san sngi lynter la wanrah ïa u sohtrun na la ka jong ka Jylla kumba 9 haduh 10 ton ha kaba haduh ka sngi ba la pynkut noh ïa katei ka tamasa la lah ban die lut baroh.
U Myntri Rangbah haba kren sha ki lad pathai khubor, u la ong ba kane kadei ka sien kaba ar ba ka sorkar ka pynlong ïa kane ka tamasa sohtrun kum ka lad ban kyntiew ïa ki nongrep ha kin lah ban pynïaid ïew ym tang hapoh ka jylla hynrei ha ri India bad sha ki ri jong ka pyrthei.
“Ka jingthmu ba kongsan jong kane ka prokram ka long ban pynïaid ïew ïa u sohtrun namar kumba 50% eiei kidei kiba rep ïa u sohtrun bad kumba 35 hajar metric ton ka Jylla Meghalaya ka pynmih ïa u sohtrun ha ka shi snem, kumta da ka jingpynlong ïa kaba kum kane ka tamasa kan ïarap ïa ki nongrep kiba man ka por kumba 15% u sohtrun u shu pyut kai na ka jingbym lah ban pynïaid ïew,” ong u Myntri.
U Myntri Rangbah u la ong ruh ba kane kan ym kut tang mynta u snem hynrei ka sorkar ka khmih lynti ban pynlong ïa kaba kum kane ka tamasa shisien manla u snem.
“Ha u snem ba la dep ka tamasa sohtrun ka long kaba biang bad mynta u snem ka la nang kham biang shuh shuh, nga dap da ka jingkmen ïa ka jingwan ki paidbah ban thied bad mad ïa u sohtrun bad ngi da khmih lynti ba kaba kum kane ka tamasa kan long shisien manla u snem,” u la ong.
U Myntri Rangbah u la ong ruh ba da ka jingpynlong ïa ka tamasa sohtrun ka long ruh kum shi bynta ban pynpaw pyrthei ïa ka jingriewspah ka kolshor jong ka Jylla, ka lad na ka bynta ki nongrep, ki nongseng kam seng jam lajong bad kumjuh ruh ka rynsan na ka bynta ki samla ba kin pynpaw pyrthei ïa ki sap ki phong kum ha ka sap rwai nalor kiwei kiwei.
Ha kitei ki san sngi lynter la sakhi ruh ba ki nong Delhi, ki nong Meghalaya kiba sah ha kane ka nongbah nalor kiwei kiwei ki briew kiba don ha kane ka Nongbah ki la tuid ban wan thied ïa u Sohtrun bad pynpaw ruh ba udei u Sohtrun uba bang bad thiang tam.
