Kumba 8 tylli ki jingkieng ba la tor naduh 18 Mile haduh Photkroh naba ïaid sahuh ki trok

Mawkyrwat, ‘Naitung, 07: Ka Hynñiewtrep Achick National Movement (HANM) Ranikor Circle kaba la ïoh ujor na ki paidbah halor ka jingsator jong ki jingkieng na ka daw ka jingïaid jong ki trok kiba kit dewïong bad kit coke kiba kit palat pud manla ka sngi, ki la leit ban jurip ïa ki jingkieng dieng kata naduh 18 Mile terter shaduh Photkroh, South West Khasi Hills District.
Ïa ka kynhun la lamkhmat da u Bah Brustar Thongi ryngkat ka jingdonlang u Bah B. Wahlang, Vice President ka HANM South West Khasi Hills District.
Ha kane ka jingjurip ka HANM ka la lap ba bun na ki jingkieng kiba don kumba phra tylli ei ei ki la sdang ban jot namar ka jingïaid lait lan ki kali ba kit palat pud.
La ong ba ha ka Signboard la ïohi ba ka tnat PWD (Roads) ka la buh ïa ka jingthoh ba ki kali ki dei ban tang hapoh 9 ton ki lah ban ïaid na kine ki jingkieng hynrei kaba sngewsih ka long ba ki trok kim bud ïa ka kyndon ba la bthah.
Namarkata, ka HANM ka la kyntu jur ïa ka Sorkar bad ki bor Pulit ba kin tuklar lem halor ka jingïaid sahuh jong ki trok kiba kit palat pud.
Ka Seng ka la maham ba lada ki bor Sorkar kim shimkhia ka seng hi kam banse ban shim da kiwei pat ki sienjam.