Kumba 8 Sngi bad 290 kilo meter shim por ki samla ban ïaid kjat naduh Tura sha Shillong

Shillong, Rymphang 03: Laingut ki samla Khasi kiba dang pule ha ki kyrdan bapher bapher ba kynthup ïa u Bashaiphar Shylla ba na Ri Bhoi District, u Kynsoijingtip Ryntathiang na Eastern And West Khasi Hills District bad u Welkinstone Shadap uba na East Khasi Hills District ki la pyndep ka jingïaid kjat haduh 8 Sngi bad 290 kilo metre naduh Tura shaduh Shillong.
Kane ka jingïaid kjat jong ki ka la sdang naduh ka 26 tarik u Kyllalyngkot kaba dei ka Republic Day.
Haba kren sha ki lad pathai khubor kine ki samla ki la ïathuh ba ka jingthmu kane ka jingïaid kjat ka long ban pynsngewthuh ïa ki nongshong shnong halor ka jingdonkam ka Koit ka Khiah bad kumjuh ruh ban kiar na ki jingmlien basniew kum u drok bad kiwei ki jingdih pynbuaid kiba ktah ïa ka met ka phad.
Ki la ïathuh ruh ba ha kine ki Sngi ki jingïaid lynti jong ki, ki la mad ïa ka jingïarap ki nongshong shnong naduh ki jaitbynriew Garo kiba ïarap ban pynbiang ban, ai jaka sah bad kiwei ki jingdonkam.
Ki la ïathuh ruh ba ym tang ki Garo ha ka por ba ki la sdang ïaid kjat naduh Tura, hynrei haba ki poi ha ki shnong khasi ruh ki ïarap lem kumjuh kumba leh ki Garo bad ka la long ka jingiaid kaba suk ba saiñ khlem kano kano ka jingshah pynthud.
Ki la ïathuh ba ki don ruh ka jingthmu ban ïaid kjat sa na Mizoram bad ong ruh ba ki leh ïa kane naba ki sngewtynnad bad ba ki ju mlien bha ban ïaid kjat naduh mynshwa.
Katba u Samla Kynsoijingtip u la ïathuh ba kane ka jingïaid kjat kadei kaba la ju mlien naduh ba ka por ba u dang khynnah bad ha ka por ba dang leit skul.
“Namarba ngi dei ki khynnah na ka thaiñ nongkyndong kan long kaba eh bha ban ïoh kali ban leit sha ki skul bad kumta ha ka jaka ban ap kali, ngi ju ïaid beit noh da ka kjat bad kane ka la kylla long ka jingmlien bad haduh kine ki sngi ba ngi leit sha ki college,” ong u Samla Kynsoijingtip.
Na ka liang kine ki samla ki don ruh ka jingangnud ba kin kyntiew ïa ki jingim jong ki da ki lynti ba bha bad ki kwah ruh ba kiwei kin ïaid ruh ha ka lynti kaba bha ban lait na ki kam kiba sniew bad khamtam eh na u drok.