Kumba 3 taïew nga shim por ban dro pynwandur itynnad ïa ka dur u (L) P A Sangma : Kong Eldora

Shillong, Nailur 28: Kan long ka khubor kaba kham sngewtynnad ba mynta ym tang ki shynrang Khasi kiba smat ban dro ne ohshrong ïa ki dur ki dar jong ki riew pawkhmat jong ka jylla bad lehse lah ruh ban ong ba kane ka kam hapdeng ki Khasi ka dang long kaba dang duna bad dang don tang khyndiat ngut kiba sngewtynnad ban shim ïa kane ka kam dro dur kum ka kam ha ka jingim jong ki.
Halor kane kawei na ki longkmie Khasi ka la mih shakhmat mynta lah slem bha ban pyni bad pynpaw ïa la ki jong ki sap bad kaba la ïoh ruh ïa kiba bun ki khusnam halor kane ka sap dro ïa ka dur jong ki riewkhraw jong kane ka jylla bad kiwei pat ki riewkhraw.
Halor kane haba ïakren bad ka Kong Eldora Betsy Lyngdoh iba dei ruh ka kurim jong u Bah Ransom Sutnga Rangbah Shnong ka Dorbar Shnong Mawkhar ka la ong ba ka dap da ka jingsngew burom kaba khraw ba kum ka artist bad kumjuh ruh ka Vice President jong ka National People’s Women Front, ka la lah ban dro bad airong pynitynnad ïa ka dur jong u riewkhraw ka jylla bad jong ki jaitbynriew Garo u (L) Purno A Sangma, u nongïalam ba iohi jngai na kane ka thaiñ shatei lammihngi.
Haba ïathuh ba ka shim por kumba 3 taïew eiei ban pyndep ban dro bad ban airong pynitynnad ïa ka dur jong u (L) Purno, ka la ong, “Ka jingpynlait paidbah ïa kine ki dur ka la pyndap ïa nga da ka jingkmen naba ka jingim jong u Sir Purno Sangma ka la dap da ka mynsiem ka jingaiti, ka jingïaineh ha ka kam bad u nongïalam ba ai mynsiem. Ki kam ba khraw kiba hiar pateng na u kin ïai bteng ban pynkhie im ïa ki pateng ban wan bad kine ki jingdro ïa ki dur ki dar jong u ki long ki kam shakri kiba ai burom ïa ki jingktah jong u ïa ngi kiba dang im. Aiba kine ki jingdro ne portrait kin long kum ka sharak hapoh ka jingim ba shitrhem jong ngi na ka bynta ban dang trei ïa ki kam kiba janai bad paka bad ka jingangnud ban shakri ïa ka imlang sahlang bad ban rai ban bat ïa ka jinglong khih mynsiem, ka jingïalong kawei bad ka jingshakri kaba ïaineh nalade. Aiba kine kin pynkynmaw ïa ngi ïa ka bor ka jingkylla jong ka jinglong nongïalam ba shimet bad kan ai mynsiem ïa ngi ban thaw ïa ki kam ba bha ki ban ktah ïa ka pyrthei ba ngi shong ngi sah.”
Ka Kong Eldora ka la ong ruh ba ka long ka kabu kaba khraw ïa ka ba kum ka artist ka la ïoh ban theh la ka dohnud bad ka mynsiem ban pynlait por khnang khnang ban dro bad airong pynitynnad ïa ka dur kaba eh shisha ban pynïanujor jong u Sir Purno A Sangma, u nongïalam ba khraw na kane ka thaiñ shatei lammihngi uba ki kam ba khraw jong u ki paw kum kiba ratbah ha baroh. “Ka jingpynlait paidbah ïa kine ki kam dro ïa ka dur ka long ka jingïoh mad kaba pynkmen shisha, ka pyndap ïa nga da ka mynsiem kaba kmen kaba ym lah ong shuh bad ka jingmut kaba jylliew ban don ka jingkitkhlieh. Ka jingim jong u Sir Purno Sangma ka la long ka sakhi kaba skhem halor ki kam aiti jong u, ka jingleh ban pynneh bad tyngkai, bad u nongïalam ba ai mynsiem uba ïaibteng ban ai ka sharak ban tbeh ïa ki pateng ban wan. Kine ki kam dro bad ai rong ne artwork ki dei ki jingai burom ïa ki jingïai bteng jong u ban ktah ïa ka jingim ki nongshong shnong bad ka jingkynmaw ïa ki kam ba khia kiba la leh, bad ki jingpynngeit ban im katkum ki jingmut ba bha jong u.”
“Aiba kine ki portrait kin ai jingshai ïa ngi ban leh ïa ki kam kiba janai, bad kiwei ki kam ban shakri ïa ka imlang sahlang ban bud ïa ki nuksa jong u bad tylli ngin ïeng na ka bynta ban wanrah ka burom ïa u,” ka la ong.
Ka la ong ba da ka mynsiem kaba long pdeng jong u yn sa lah ban pynkupbor ïa manla ki jylla bad ka National People’s Party, kaba trei na ka bynta ka thong ka India, la ka dei na ka bynta ka jingïalong ryngkat, ka jingïalam sha ka jingshai bad ka jingdonkam ban ïaid shakhmat lyngba ka sngi bad ka miet.
“Ha ki lum jong ka Meghalaya ha kaba la plie ïa ki jingphoh sniew, ka jingïohi jngai ka NPP ka phalang da ka jingsamla bad ka jingshlur, ngin pynneh ïa ka kolshor kaba riewspah bad kaba laitluid bad ban wanrah ïa ka roi ka san ïa baroh khnang ba kin lah ban ïohi ïa ki kan jong ka. Lyngba ki kam ba ratbah jong u P.A. Sangma ngin ïaid shakhmat la ki kam babha, ngin trei khlem shongthait na ka bynta ka bha ka miat jong baroh, bad ban wanrah ka jingkyrmen bad ka jingkhylla bad ngi dei ruh ban leh ïa kane. Ka jingmut jong ka party jong ngi ka shong tynrai ha ka jingsarong kaba sdang na kane ka thaiñ, ngin buh hakhmat ïa ka jinglong kyrpang ka thaiñ shatei lammihngi, ngin pynkupbor ïa ki samla ba ki longkmie bad ban pynthikna ba ïa ki sur jong ki dei ban sngap. Da ka saiñ pyrthei kaba khleh khaw lang ngin tei ïa ka jingïateh kaba khlaiñ ban trei na ka bynta ki nongshong shnong, bad da ki dohnud kiba ïeng rasong ka kam jong ka NPP ka long ban shakri ban kyntiew bad ban wanrah ïa ka lawei kaba bha na ka bynta baroh,” pynkut ka kong Eldora Betsy Lyngdoh.