Kumba 2216 tylli ki longïing ïoh jingïarap na u MLA Mawthadraishan

Kynshi, Ïaïong 01: Kumba 2216 tylli ki longïing ha Mawthadraishan Constituency, ki la ïoh jingïarap lyngba ka MLA Scheme jong u MLA Mawthadraishan na ka bynta u snem 2021-2022.
Kane ka skhim kadei ka skhim shimet ba la ai sha ki longïing kiba duna ka ïoh ka kot lyngba ki tin bad da ka pisa. Ïa kane la ïathuh da u Bah H.B Nongsiej, MLA Mawthadraishan ha ka jingïalang kaba la long ha Kynshi hynnin ka sngi, ha ka por ba sam ïa ki skhim sha ki Shnong ki thaw bad sha ki Seng Kynthei.
Hynnin la sam da ki hajar tylli ki shuki sha ki shnong ki bym pat ïoh satia ïa ki shuki na ka MLA Scheme, khnang ba kin pyndonkam ha ba don ka jingïap briew, khawai bad kiwei de ki jingdonkam ha Shnong. Nalor ki shuki la sam ruh da ki tyrpal mar ar tylli shi shnong.
Haba kren ha kane ka jingïalang, u Bah Brol, ula ong ba ka jingsam ïa kine ki shuki bad ki tyrpal ka long ban ïarap ia ki shnong ki thaw ha ka ïap ka im bad kiwei pat ki jingdonkam, namar bun ki shnong ki shem jingeh wat ban thied ïa ki shuki namar ka jingduna pisa.
Ha ka snem kaba la dep, u la ïathuh ba u la sam ïa ki tiar pynsawa. Khamtam ban ai ïa ki jingpynbna bad ki jingbthah ba donkam ha ka por ba jur bha ka jingpang khlam COVID 19. U la ïathuh ruh ba la sam ïa ki Generator sha ki 11 tylli ki Zone jong ka Constituency ba la peit bad pynïaid da ki Nongïalam ka Seng kiba don ha ki Zone.
“Kumba nga la khlei naduh ba nga jop ha u 2013 ba ngan leh hok ïa ka skhim jong ki paidbah bad ngan nym bam sap, ngan ïai bteng ban sam katba ka skhim ka dang pyllait na ka sorkar”, la ong u MLA.
U la kyntu ïa ki Shnong ki thaw kiba la ïoh ïa ki shuki bad tyrpal ban pyndonkam hok bad sumar bha ruh ïa ki, khnang ba ki paidbah kin ïoh jingmyntoi. Na ka bynta ki khiew shet u la ong ba la aiti ha ki Seng Kynthei, khnang ba kin peit bad sumar na ka bynta ka jingdonkam ha Shnong.