Shillong, Nohprah 17 : U Symbud Myntri Rangbah ka jylla uba dei peit ïa ki kam pynroi sor bad Municipal u ma Sniawbhalang Dhar u la ïathuh ba ka jingpynkhuid ïa ka Marten kaba ha Mawlai Mawiong ka la ïaid shaid shaid namar kumba 2 lak ton u niut u nier na katei ka jaka bret niut la dep kit da ki kompani ban pynkylla sboh tang hapoh une u snem.
“ Na ka bynta ka jaka bret niut kaba thymmai ym pat rai haduh mynta kumta katba ym pat rai ïa kaba thymmai yn kit lut ïa ki niut na ka Marten namar kiba sah u long sa tang 1.8 lak ton ei ei” ong u ma Sniawbha.
“ Ha u snem ba la dep la kit kumba 3-4 lak ton bad mynta u snem kumba 2 lak ton bad ïa kine ki niut la kit ban pynkylla sboh bad uba sah mynta u long sa kumba 1.8 lak ton ei ei bad la kyrmen hapoh kine ki khyndiat por yn sa lah ban kit lut ïa u niut ba sah na Marten” ïathuh biang u ma Sniawbha.
U La pynpaw ka jingkyrmen ba ïa kane ka kam yn sa lah ban pyndep noh shen kumba la ïakhut ha ka Tender. U ai khublei ïa ki Dorbar Shnong kiba la shim khia ban hikai ïa ki paidbah kumno ban pynïakhlad ïa u niut naduh na ïing na sem. “Nga dap da ka jingkmen bad ai khublei kyrpang ïa ki Dorbar Shnong kiba la ïashim bynta ha ki prokram ai jinghikai ïa ki paid nongshong shnong ba kin nang kumno ban pynïakhlad ïa u niut naduh na la ïing. Kane ka long ka jingsdang jong ka jingnang ban lehkhuid leh suba jong ki paidbah” ong u Myntri.
