Shillong, Jylliew 11 : Ka sorkar ka la pynkhreh ban tei haduh 100 tylli ki jingkieng la ki dei kiba lah ban ïaid kali ne ïaid kjat ki briew ha ki 100 tylli ki jaka khnang ban pynïasoh ïaki shnong kiba shem jingeh ha ka leit ka wan ha ka por lyiur namar ki hap ban ïaid beit lyngba ki wah.
“ La kumno kumno ruh 50 haduh 100 tylli ki jaka ngin pynïasoh da ki jingkieng kiba lah ban ïaid ki kali bad ki briew ruh khnang ba ki paidbah kin lait na ki jingeh ha ka por lyiur” ong u myntri rangbah u Conrad K Sangma.
U la ïathuh ka sorkar ka kwah ban pynïasoh ïa kiba bun ki shnong da ki surok, ki lynti ki synkieng khnang ba ki paidbah kin ym ia kynduh jingeh ha ka por ba kiew ka um ha ka por lyiur.
Ka sorkar ka buh thong ba baroh ki shnong kim dei ban mad ïa ki jingeh tang shu la wan ka aiom lyiur bad kan shna da ki jingkieng ban pynïasoh na shilliang sha shilliang ka wah la ka long kiba lah ban ïaid kali ne kiba lah ban ïaid tang ki briew ruh.
Lehse lah ban ym lah pyndep baroh hapoh u snem hynrei kane kan long ka polisi treikam jongka sorkar nangne shakhmat ba baroh ki shnong ki dei beit ban suk ka leit ka wan.
