Nongpoh, Nailar 11: Ban dang pynkhlaiñ ïa ki kam shakri na ka bynta ki paidbah ka thaiñ Nongpoh bad ka Ri Bhoi District hi baroh kawei kum ki nongïalam seng kiba don ka jingkitkhlieh na ka bynta ka eh ka shon ki paradoh ki parasnam, ka Khasi Students Union, North Khasi Hills District Unit mynta ka sngi ka la lah ban pynskhem ïa ki nongïalam jong ki ar tylli ki Unit ha Ri Bhoi ba kynthup ïa kaKSU Pahambir Unit bad ka KSU Nongpoh Town Unit ha ka jingpeit jingkhmih ka KSU Nongpoh Circle.
Ka jingwan pynïasoh u Samla Anthony Syiem, uba dei u rangïakura ba paw ha ka jylla (MMA) sha ka KSU Nongpoh Town Unit kum u Adviser ka la ai mynsiem ruh ïa kine ki nongïalam ki Unit bad wat ïa ka seng ha Ri Bhoi, namar kum ka seng KSU ka kmih lynti ba ki samla kin wan ban pynïasoh sha ka seng na ka bynta ban trei bad ban shim ka jingkitkhlieh ban trei na ka bynta ka jaid bynriew.
Ïa ki nongïalam jong kine ki ar tylli ki Unit la wan ban pynskhem da u Samla Biangbor Paliar, Vice President ka KSU, Sengkmie ha ryngkat ka jingdon lang u Samla Ferdynald K Kharkamni, President KSU NKHD unit, samla Joseph Lambok Rymbai Vice President KSU NKHD unit, samla Banjop Maring Education Secretary KSU NKHD unit, samla John Lyngdoh President KSU Nongpoh Circle, samla Banpynshngaiñ Lyngdoh Adviser KSU Nongpoh Circle bad ryngkat ki dkhot na ka district bad circle.
Ha ba ai jingkren ha katei ka sngi na ka liang u samla Biangbor L Paliar u la ai ka jingïaroh ïa ki samla ki ba la shim ïa ka sienjam ban pynïasnoh sha ka KSU, namar ym dei ka jingshah pynbor ha no re hano bad dei da ka mynsiem ba kylluid ba ki la wan ban ïasnoh bad ka KSU.
U la pynkynmaw ruh ïa ki mat ba ka seng ka shim na duh ki por mynshwa kum ka jingdawa ILP, ka jingpyrshah ïa ka Surok Rel bad kiwei kiwei ki mat ba ka seng ka ieng ban ïakhun na ka bynta ka daw bah jong ka jaid bynriew..
Na ka liang u samla Ferdynald K Kharkamni u la ong ba ki jingkharoi sted haduh kata kata ha ki ne ki sngi ba mynta dei u Droks. U la kyntu ïa ki samla ba kin long ki ba adkar na kum kine ki jait bad ruh u la ong ba dei ban peit pyrman ïa ki shnong ki thaw ban ai ka jing ïa trei lang bad ki kmie ki kpa, ki shnong ki thaw ban lah ban rad diengkhong ïa kum kine ki jait jingsniew. Ïaka jingïalang la pynïaid da u samla Baïashanlang Kharshanlor ,General Secretary KSU Nongpoh Circle.
