Kum u nongthaw aiñ nga kwah ki rukom pyrkhat treikam ym ïa ka saiñ pyrthei: Adelbert

Shillong, Nohprah 06: U MLA ka 17th North Shillong Constituency u Bah Adelbert Nongrum ha ka sngi saitjaiñ u la ong ba kum u briew shimet bad kum u nongthaw aiñ u kwah ïa ki rukom pyrkhat ïa ki kam ne policy ym pat ïa ki kam saiñ pyrthei.
Ïa kane u la kren ha ka jingïalang jong baroh ki nongïalam shnong jong ka Constituency bad ki nongïalam ki seng bapher bapher ba kynthup ïa ki seng samla, ki seng longkmie, na ka Seng Khasi, bad kiwei kiwei pat ki seng.
Ïa kane ka jingïalang kaba long ha ka sien kaba nyngkong eh kaba dei kaba sam ïa ki work order jong u snem 2002-23-2004-25 kaba la long ha dorbar shnong Wahingdoh kaba la kot T. 500 klur.
“Nga la kular ba lada nga jop ne rem ngan bteng ïa ki kam shakri ïa ki paidbah bad kumjuh ruh ïa ka constituency khamtam eh kito ki longïing kiba wan na ki ïing kiba duk ba kyrduh bad kiba tlot ha ka ïoh ka kot,” ong u Bah Adelbert Nongrum.
U la ong ruh ba kum ka imlang sahlang ym dei satia ban ailad ïa ki kam bym wanrah jingsuk, hynrei ban ïada ïa ki trai ri trai muluk kumjuh ruh ïa ki bar jylla kiba la im la kha ha kane ka jylla naba baroh ki ïa ïeng lang ban ai kajuh ka jingshakri ban kyntiew ïa ka jylla.
“Ngim lah ban phiah ïa ki bym Khasi ne ba kin iehnoh ïa kane ka jylla. Ngim dei ban pulom ban ïakren ïa ka roi ka kiew ne ka roi ka san. Nga don bad ka VPP kaba ngeit ha ka khuid ka suba kaba dei ka rukom treikam kaba nga la dep shim naduh shwa ban pynïasoh ha ka VPP,” ong u MLA.
U la ong ba kine ki work order kidei ka dak ban don ka jingïatreilang kaba long ïaryngkat lang. “Nga buh ka jingkitkhlieh hakhmat ka shuki shadien ki briew ki jied ïa nga ym na ka bynta ka shuki hynrei na ka bynta ka roi ka san. Nga ngeit ba ki Rangbah Shnong kin khmih bniah (supervise) ïa ki kam ban ym don ka jingïapeiñ (compromise) ïa ka work quality bad nga kyntu ïa ki engineer ba kin leit jngoh ïa ki kam. Nga kyntu ïa ki Rangbah Shnong ban ym ai completion certificate lada ym don ka job satisfactory. Nga jop ïa ka elekshon da ka jingieid ki paidbah ym da kaba pynlut da ki spah klur,” ong u Bah Nongrum.
U la ong ba ha shwa ban kylla ïa la ka nongrim jong u, un ieh noh ïa kiei kiei baroh. “Ngim lah ban shah ïa ki samla khlem kam khlem jam ban ai bai seng ba kin lait na ki jingsniew kane ka por kaba mynta,” ong u MLA.
U MLA u la ai khublei ïa ki Rangbah Shnong jong ka constituency kiba la ju ïatreilang na ka bynta ka roi ka kiew bad pynpaw ka jingkhmih lynti ba kin nang ai ka jingïatreilang nangne shakhmat. U la khublei ruh ïa ki nongshong shnong ka 3 European ward, na Jailroad, bad na PB ba ki la sngap ïa ka jingkhot jong u ha kane ka jingïalang. “Haba treilang ngin lah ban tei ïa ka lawei bad ka bha ka miat ki nongshong shnong. Kane ka dei ka sien nyngkong ba ka jia ha constituency. La ïoh ki kyntien pdiang na u Rangbah shnong ka Wahingdoh bad kiwei kiwei ki prokram kynthup ki jingrwai nalor kiwei pat.