Shillong, Nohprah 22 : Ki paidbah nongthep vote jong ka Laban – Mawprem constituency da kawei ka sur ki la kyntu ïa u MDC barim jong ki, Bah Ricky Shullai ba un aireng kum u kyrtong shimet ha kane ka elekshon MDC kaban sa long ha ka 21tarik u Rymphang mynta u snem.
Ïa kane ka rai la shim ha ka jingïalang ha Lawsohtun kaba dang shu lah shen ha ryngkat ka jingsakhi lang da u paidbah.
Ha kane ka sngi na ka liang u Bah Ricky Shullai u la ong ba watla ha kine ki hynriew snem um shym la don ha bor hynrei um shym la rieh lane kiar na u paidbah pynban u don ryngkat la ka long ha ka kam sngewsih ne wat ha ki kam sngewbha ruh.
“Ngam shym la rieh hynrei nga ïai bteng ban trei jar jar bad don ryngkat bad phi ha kine ki 6 snem ba la dep,” ong u Bah Ricky haba kren ha kane ka jingïalang.
Shwa kane, u la pan ruh ïa ka rai na u paidbah la ki kwah ba un pan tiket na kano kano ka party lane ki kwah ba un ïakhun kum u kyrtong shimet. Hynrei na ka liang ki paidbah da kawei ka sur ki la rah ïa ki kti ban kyntu ïa u ba un ïakhun beit kum u kyrtong shimet.
Kumta, halor kane na ka liang u Bah Ricky u la ong, “Nga pdiang bad nga burom ïa ka rai kaba phi shim na bynta kane ka elekshon.”
Shuh shuh u ong ruh ba ka jingbun ki paidbah kiba poi sha katei ka jingïalang ka la ai mynsiem ïa u ba un tur shakhmat na ka bynta kane ka elekshon kaban sa long ha u Rymphang.
Ha kane ka jingïalang, la ïoh ruh ïa ka jingkren na kiba bun ki riewrangbah bad ki longkmie kiba la ïathuh ïa ka daw kaba pynlong ïa ki ban wan kyrshan ïa une u rangbah na bynta kane ka elekshon kaban sa wan.
Kumba long haduh mynta, ki la don lypa lai ngut ki kyrtong kiba la pynkhreh ban aireng na ka Laban – Mawprem constituency ba kynthup ïa u Bah Ricky Shullai, nangta u kyrtong ka UDP Bah Mitchel Wankhar ba dei ruh u MDC ba mynta bad kumjuh ruh u kyrtong na ka VPP Bah Danny Langstieh.
