Shillong Nohprah 04 : U Symbud Myntri Rangbah ka Jylla u Bah Prestone u la kyntu ïa ki nongshong shnong ka Nohwet ba ki dei ban long kiba la pynkhreh ban pdiang ïa ki nongjngohkai namar tang shu dep shna ïa ka surok Shillong Dawki, kan jur bha ka jingwan jongki nongjngohkai bad kidei ruh ban shimkabu ban shna ïa ki Homestay lyngba ka jingai jingkyrshan ka sorkar Jylla.
Haba kren kum u kongsan ha ka jingpynhap pyrda ïa ka jingrakhe ïa ka Jubili Ksiar jong ka Lympungdama Sports Social Welfare and Cultural Club kaba don ha ka shnong Nohwet, u Bah Prestone ula ong, ba ka Nohwet kadei ka shnong kaba heh tam ha ka Pynursla Constituency bad ula kyntu ïa ki paidbah ba dei ban ïai pyniwbih ïa kane ka shnong kaba don burom kaba ki nongjngohkai na kylleng ka ri India ki wankai bad kan long kaei kaei ka burom ïa ka shnong bad ïa ka thain Riwar ynda kine ki nongjngohkai ki leitphai sha la ki jaka kin pynsaphriang da ki khana kiba bha ïa ka shnong Nohwet.
“La tikna ba tang shu dep shna ïa ka surok Shillong-Dawki, kan jur shuh shuh ka jingwan tuid ki nongjngohkai sha kane ka jaka ban ïa ka Sohra, kumta ki paidbah kidei ban long kiba la pynkhreh bad ruh ban long kiba don burom bad ba kim dei ban pynthud ïa ki nongjngohkai kiba wankai sha kane ka thaiñ,” la ong u Bah Prestone.
U la kyntu ruh ïa ki nongshong shnong ban shim ïa ka skim ban shna ïa ki homestay kaba ïoh haduh 30 persen kadei ka ram bad 70 persen kadei kaba ai da ka sorkar bad dei ban shimkabu ïa kane khnang ba kan kylla long kum ka lad ban kamai jakpoh kaba shirta.
Haba phai sha ka jingdap 50 snem ka Club, u Symbud Myntri Rangbah ula ïaroh ïa ki nongïalam kiba la shimkhia bad trei shitom ha kaba ka Club kala lah ban kynjoh sha ka rta kaba 50 snem ha kaban saindur bad ban ai jingshakri ïa ki paitbah ha ki bynta bapher bapher bad ula kyrpad ïa ki paitbah ba kin ïatreilang bad ka Club khnang ba kan shim ïa ki sienjam ban ai jinghikai ïa ki khynnah bad ki samla ba kin kiew shaphrang ha ka jingim ka jongki.
U la kular ban shimkhia ïa ka jingkyrpad ban shna ïa ka madan ïalehkai kaban long kum ka Mini Stadium khnang ba yn ïoh pyndonkam da ka shnong baroh kawei bad ula pyntip, ha u snem ban wan yn sa sdang noh ïa ka kam ban shna ïa ka ophis treikam jong ka Club.
Kum shi bynta jong ka jingpynhap pyrda ïa ka jingrakhe, la sam ïa ki khusnam sha ki khynnah kiba la jop ha ki jingïakob ki bapher bapher bad la pynkup burom ruh ïa ki nongialam kiba mynta bad kiba la khlad noh kiba la trei shitom ha kaban seng 50 snem mynshwa ïa ka Lympungdama Sports Social Welfare and Cultural Club.
La donlang ruh ha kane ka sngi naduh ka MDC jong ka Nongshken ka Kong Grace Kharpuri, ki riew rangbah kiba kynthup ïa u Bah Rahbok Tynsong, ki Nongïalam Shnong, ki nongïalam bad ki dkhot jong ka Club bad ki paidbah ka shnong Nohwet.
