Nongstoiñ, ïaïong, 24: Halor ka jingsaphriang ka video ha ki social media ba bret khunlung ha Nongstoiñ ha ka step sngi u Blei, ki heh pulit jong ka West Khasi Hills ki la pynshai ba kane ka jingjia ka la jia ha shnong Upper New Nongstoiñ Block 2, ha ka por 5 baje mynstep, ha kaba kawei ka longkmie ba don jingshitom ha ka jingmut jingpyrkhat ka la kum ieh ïa I khunlung hakhmat ïing jong I kong Miloda Nongsiej.
Hadien ba la ioh jingtip, na ka liang ki pulit ki la leit sha katei ka ïing bad la rah ruh ïa itei I khunlung sha Civil Hospital Nongstoiñ ban phah peit ha ki Doctor. Hynrei tang hadien katto katne por la wan poi sa ka kmie jong itei I khunlung ryngkat kiba haïing.
La ong ba ka kmie (ba la buhrieh kyrteng) jong I khunlung, ka don hapdeng ka jingshah sumar ïalade bad dang ha ka sngi saitjaiñ ka dang leit shim dawai ïalade na Sanker Shillong. Na ka liang ki pulit ki la ong ba itei I khunlung I don hapdeng ka jingkoit jingkhiah bad kham hadien ba la pyndep ïa ki jingdonkam, la aiti noh sha ka kmie ieit. Katba ïa ka kmie pat jong I khun pat la bthah ban phah sumar bha.
