Kum ki shnong ngim pat kyrshan bad ngim pyrshah ïa ka 5 Star Resort, hynrei ngi kwah shwa ka jingpynshai

Nongpoh, Ïaiong 11: Ki nongïalam shnong jong 4 tylli ki shnong haka thaiñ Umiam ba kynthup ïa u Bah Steven Kharkrang Rangbah Shnong Umiam, Bah Jinu Kharbuki Rangbah Shnong Mawlyndep, Bah William Lyngdoh Rangbah Shnong Umniuh bad u Bah PJ Kurbah Rangbah Shnong Umbir kila pynshai ba kum ki shnong kim pat ai ka jingkyrshan ïa ka project ban tei ïaka 5-star Resort ha Umiam, khamtam ha kaba ïadei bad ka jingpyrshah ban shna eiei ha Lumpongdeng Island, hynrei haduh mynta ki dang sah haka umdum namar kam pat don kano kano ka jingpynshai bad ka jingtip ba thikna ha kaba ïadei bad katei ka project.
Haba kren sha ki lad pathai khubor naka liang kitei ki nongïalam shnong kila ong ba haduh mynta kim pat ai kano kano ka jingkyrshan ba pura ïa katei ka project kumba la kren da u DC sha ki lad pathai khubor hynrei kum ki nongïalam shnong ki kwah shuwa ka jingpynshai ha kaba ïadei bad katei ka project la ki dei ban pyrshah ne ban pdiang, namar kumba long haduh mynta kam pat don kano kano ka jingïakren bad ki shnong ha katei ka thaiñ ha kaba ïadei bad katei ka project lait noh tang ka jingkhot u DC haka 10 tarik mynta u bnai ba ki shu leit ban sngap ïaka jingpynshai namar kane ka dei ka sien ba nyngkong ïaki ba kin shah khot ïakren.
Shuh shuh ha kaba ïadei bad ka jingïakhih jong ka Green Tech Foundation naka liang kitei ki nongïalam shnong kila shu kyndit ban iohi ha ki lad pathai khubor hynrei kam don kano kano ka jingtreilang bad ka shnong ban sngewthuh khambha ha kaba ïadei bad katei ka jingïakhih kaba la shu pynsah umdum ïaki nongïalam shnong.
Haduh mynta kum ki nongïalam shnong kim pat lah ban ai ka rai la kin kyrshan ne pyrshah namar ki dang pan ka jingpynshai halor ki jingthmu jong ka sorkar ban pyntrei ïa katei ka project ha pung Umiam.