Kum ki shipai yn ïakhun ka NPP Farmer’s Front ban weng jingeh ki nongrep ka jylla

Shillong, Nailur 07 : U Chairman ka NPP Farmers Front (NPP-FF), Bah HM Shangpliang ha ka sngi Saitjain u la ong ba ka jingthaw jong ka party ïa ka Farmer’s Front ka long ban peit bad weng ïa ki jingeh kiba harukom kiba ki nongrep ha ka jylla ki kynduh na ka por sha ka por.
Ïa kane u Bah HM Shangpliang u la kren ha ka jingïalang pynskhem ïa ki nongkitkam jong ka West Jaintia Hills District NPP Farmer’s Front bad kumjuh ïa ka NPP Block Farmers Front ha ka jingïalang kaba la long Iing Dorbar Shong Mynthong Community Hall .
La donlang ha kane ka sngi naduh u MLA ka Jowai, Bah Weiladmiki Shylla kum u Kongsan, Secretary ka NPP-FF Bah Egenstar Kurkalang ryngkat ki nongïalam jong ki nongrep kiba wan na kylleng ki bynta jongka West Jaintia Hills ban sakhi lang ïa ka jingpynskhem ïa ki nongïalam ka distrik.
U Bah HM Shangpliang u la ong ba ka sorkar ba lamkhmat da ka NPP hapoh ka jingïalam jong u Myntri Rangbah ka Jylla Conrad K Sangma, ka dei ka sorkar kaba phai khmat sha ki nongrep. U ong ruh ba dei na kane ka daw ki buh ïa kane ka tnad treikam ba kyrpang ban peit ïa ki nongrep ba kan lah ban peit kyrpang la ka long naduh ki skim, ki jingïarap bad bun ki jingmyntoi kiba ïadei na ka bynta ka jingmyntoi ki nongrep ka jylla.
“Ka sorkar NPP ka la thaw ruh ïa ka Farmer’s Front ba kin long kum ki shipai jong ka NPP khnang ba kin lah ban ïa khun ïa shibun ki jingeh kiba ïadei bad ki nongrep,” u la ong.
Nangta u la ïathuh ruh ba ka skhim Focus bad ka CM- Assure kumjuh ka skim CM – Elevate kine ki dei ki skhim kyrpang ba la buh na ka bynta ki nongrep bad nalor kata ka sorkar ym tang ba kan ai ïa kita ki lad jingïarap sha ki nongrep, hynrei kin thaw lad ruh ban don kata ka iew ka hat namar ki nongrep lada ym don dor ki mar ki mata kin nym ïoh jingmyntoi satia.
Ha kane ka sngi, na ka liang u Bah HM Shangpliang bad u Bah Egenstarene Kurkalang ki la pynshai sha ki nongrep, ba ka thong jong ka Farmers Front, ka dei ka ban ïarap bad ruh ban lum jingtip ïa ki nongrep bad ki jingeh kaba ki ïa kynduh ha ka jylla bad nangta kin sa thaw ïa ki lad ki lynti ban ïarap kyrpang na ka bynta ki nongrep.
U MLA ka thaiñ haba kren ha kane ka jingïalang u al pynpaw ka jingkmen kaba khraw halor ka jingtreikam jong ka Front. U la ong ruh kum ki nongmihkhmat ki ïoh mynsiem ban trei shitom bad wad ki lad ki lynti na ka bynta ki paidbah ka constituency bad ka jylla haba don ki nongïalam kiba pyni bad ai jingmut lang khamtam eh haba ïadei bad ki nongrep.
“Ngi ruh ngi kular ban trei shitom shuh shuh watla ki duna ka ktien hynrei ngin pyni beit da ka kam na ka bynta u paidbah,” u la ong.
Ki nongïalam kiba la pynskhem bad pynkup bor ha kane ka sngi ki kynthup ïa u Bah Mutshuwa Thabah kum u President ka NPP District Farmers Front, Bah Damechwa Dhar kum u Secretary bad la pynskhem bad ai ruh ïaki syrnod ïa ki nongkitkam ha ki Block bapher bapher kiba hap hapoh ka District.