Kum ki nongmihkhmat ngi thaw ïa ki aiñ hadien ba la wan ka jingjia kiba shah ktah: Lahkmen

By Mawphor Editor On Sep 26, 2025

Shillong, Nailur 25: U Myntri ka tnat Pule Puthi ka sorkar jylla u Bah Lahkmen Rymbui u la ong ba ka saïan ka wanrah ïa ki jingkylla ha kiba bun ki liang bad ki jingshem thymmai hynrei kane ka jingshem thymmai kadei ruh ban pynneh ïa kaei kaba long kaba kongsan.
Ïa kane u la kren ha Science Fest ba la pynlong da ka Synod College ha ka sngi Palei. “Ka Saïan ka la wanrah bun ki jingkylla la ka long ha ka koit ka khiah, ha ka kam sumar ïa kiba pang, ha ka pule puthi, ka pynkylla ïa ka rukom jong ka kit ka bah, bad ka lad pynïasoh, bad ka science and technology ka la wanrah ka jingkylla ïa ka jingim jong ngi hynrei hato ka long kaba neh, kane ka dei ka jingkylli kaba heh,” u la bynrap da kaba pynpaw ruh ïa ka jingsngew bynniaw ba bunsien kum ki nongmihkhmat ki sa thaw ïa ki aiñ tat haduh ba la mih ki jingshah ktah, shah pynjulor hynrei ym ju ïohi lypa ïa kiei ki ban jia na kiei kiei ki jingshem thymmai
U la ong ba ki jingshem thymmai ki lah ban long kiba neh lada baroh ki nongshong shnong, ki nongthaw aiñ, ki samla pule ki sngewthuh ïa ki jingktah ne jingmyntoi kiba ïoh na ki bad lada la sngewthuh ïa kino kino ki jingdkoh bad kumno ban pynbha ïa ki bad lada sngew ba ka ktah ïa ka jingim ba manla ka sngi bad ïa ka sawdong sawkun, bad ban sngewthuh ruh kumno ban pynduh ïa ka bad kumno ban pynbha ïa ka, kumta ka bynta jong manla iwei pa iwei ka long kumno ban wanrah ïa ka kam kaba lah ban pynneh.
“Kum ki nongthaw aiñ ngi sngewthuh ynda la hadien ba la mih ki jingktah ba ngin sa sdang ban thaw ïa ki aiñ ban ïada, haba ki kam karkhana ki kiew ngim ju pyrkhat ïa ka jingjaboh, ngi ring bording lyngba ka wah ngim ju pyrkhat ban ïoh ka bording kaba khuid (clean energy), bad ngi leh ïa kaei kaei kaba ktah ïa ka mariang bad ka pyrthei bad haba ka por ka la poi bad ba ka la long kaba la slem, ngi sa wanrah ïa ka Pollution Act, bad kane kam jia tang ha Meghalaya hynrei ha ka pyrthei baroh kawei,” u la bynrap.
U la ong ruh ba lyngba ki jingshem thymmai ki longshwa manshwa kim ju khmih lynti ba ka Nongbah Shillong ba kan bthei da ka jingbun paid bad ba kan jaboh, ki pyrkhat ba ka surok kaba ki la pyrkhat spah snem mynshwa kin neh ban pynbiang ïa ka ïaid ka ïeng hynrei em.
“Ki longshwa manshwa jong ngi ki pyrkhat ba ka wah Umkhrah kaba itynnad bad kumjuh ruh ka wah Umshyrpi kin im bad ba ki dei ban im, hynrei em, ngim lah ban pynïaryngkat ïa ka jingim jong ngi bad ka sawdong sawkun, bad ka jingsdang kiew jingheh ka nongbah, kumta ka long kaba kongsan ïa ki samla pule ban pyrkhat ïa kaei kaba shem thymmai ba kan pynneh pat ïa kaba bha kaba la don lypa, kumta dei ban ïaleh katba ban sumar ïa kaei kaba la don lypa bad ban pynïaryngkat pat ïa kaei kaba shem thymmai,” u la pynpaw.
Ha kane ka sngi la ïoh ruh ka jingkren na ka Principal ka Synod College Shillong ka Dr. (Mrs) G Lyngdoh, ka jingrwai na ki khynnah B.sc 3rd and 4th semester. U Bah Lahkmen Rymbui kum u kongsan u la leit ruh ban plie Inter-College Science Exhibition bad Inter-School Science Exhibition bad Science Quiz ha ka sngi palei ba la pynlong ïa ka Science fest 2025, ha kaba ka phang jong kane kadei ‘Science technology and innovation for sustainable development,’ bad ïa kane la pynlong lang da ka The Four science departments, ha Synod College ha ka jingïatreilang bad ka Science club, environmental club, jong ka Synod College kum shi bynta na ka jingrakhe ïa ka diamond jubilee.
Na ka liang ka Principal ka la ïathuh ba ïa kane ka Science fest kadei kaba la pynlong manla u snem, hynrei mynta u snem ka kham kyrpang namar ka jingdap 60 snem jong ka College, kaba la seng ha u snem 1960 bad ka la kiew suki suki ha kaba mynta ka la don kumba 3 hajar tam ki samla pule bad ka la ïoh ruh ïa ka kyrdan A+ grade.