Kum ki nongïalam ngi dei ban kynmaw ba ki paidbah ki jied ïa ngi da ka jingieid: Sniawbhalang Dhar

Jowai, Jylliew 08: Ka National People’s Party 1 Nartiang Constituency West Jaiñtia Hills Distrcit Meghalaya, ha ka sngi Saitjaiñ ka la pynkup burom ïa ki 4 ngut ki MDC jong ka party kiba la jop donburom ha ka election MDC ba dang shu dep long shen sha ka Jaiñtia Hill Autonomous District Council mynta u snem.
Kine ki MDC ki kynthup ïa u Bah Thombor Shiwat na Moodop–Umladang Constituency, Bah Jesse Suïam na Moodymma- Nongkhroh Constituency, Bah Pheinshwa Nangleiñ na Mynsngad–Khanduli Constituency bad u Bah Reforming Son Lamare na Nartiang-Wahïajer Constituency.
Ha ka jingïalang ba la pynlong ha Wahïajer Community Hall la sakhi lang da u Symbud Myntri Rangbah ka Jylla u Bah Sniawbhalang Dhar uba la long kum u kongsan, u President jong ka NPP Nartiang Block Constituency u Bah Hamkom Khynriam, u Adviser ka NPP Nartiang Block Constituency Bah Briwon Pohshna, ka President jong ka NPP Women Wing West Jaiñtia Hills District Kong Lily Phawa bad kiwei kiwei.
Hadien ka jingpynkup burom ïa ki MDC da ki nongïalam ba hakhmat jong ka party, la ai jingkren lyngkot na ki lai ngut ki MDC kiba kynthup ïa u Bah Reforming Son Lamare, u Bah Pheinshwa Nangleiñ (Executive Member) JHADC bad u CEM ka JHADC Bah Thombor Shiwat kiba la ai khublei kyrpang ïa ki paidbah nongkyrshan, ïa ka party bad khamtam eh ïa u Symbud Myntri Rangbah uba dei ruh u MLA.
Ki la ong, dei da ka jingtrei shitom jong ki nongkitkam kaba la lah wanrah ïa ka jingjop donburom ïa ka party hapoh ka Nartiang Constituency ha ka election MDC wat lada ki jingïaleh ha baroh ki Constituency ki long kiba jwat bha.
U Bah Sniawbhalang haba kren kum u kongsan ula ai khublei kyrpang ïa baroh ki MDC kiba la ïoh ïa ka jingjop donburom ha ka elekshon 2025. U la ai khublei ruh ïa baroh ki nongïalam ka party bad kumjuh ïa ki paidbah nong kyrshan ka party.
U la pynkymmaw ïa baroh ki MDC ba ki dei ban trei shitom ban ïarap bad ban wanrah jingmyntoi ïa ki paidbah ha kino kino ki rukom ba ki donkam bad ruh ban trei shitom na ka bynta ka bha ka miat jong ka rilum Jaiñtia hi baroh kawei.
U kongsan u la pynkynmaw ruh ïa ki MDC bad ki nongïalam jong ka party ba kin long kiba ïa tylli, kiba ïa ieid bad ruh kiba trei hok ïa ka kam ba la bynshet ha ki.
“Kum ki nongïalam ngi dei ban kynmaw ba ki paidbah ki jied ïa ngi da ka jingieid bad ka dei ka kamram jong ngi ban trei ruh ïa ki da ka jingieid ban warah ïa ka roi ka par ha ki Constituency jong ngi” ong u ma Sniawbhalang Dhar.