Da u Banroi Syiem
Nongpoh, Jymmang 07: Sa shisien pat hadien 4 snem ha shuwa ka jingïalehkai phutbol kaba heh tam haka pyrthei bala tip kum ka World Cup, ka Ñiangtaser kaba la ju tip haka ktien khasi kaba la khot ruh kum ka Ñiang World Cup lane ka Cicada Chremistica haka ktien nongwei kala sdang ban mih biang ha Ri-Bhoi kaba dei ruh ka khñiang phylla kaba ju tyngkhuh ban mih sha ka pyrthei shisien haka saw snem ha u snem ba pynlong ïaka World Cup kaba ju jia ryngkhat ruh mar sien sdang kut katei ka jait khñiang ka world cup ruh kala sdang hynrei mynta u snem pat ïaka world cup la pynkynriah noh haduh u bnai Naiwieng.
Katei ka jait khñiang ka sdang ruh ban mih naduh u bnai Ïaiong bad neh tang kumba katto katne por bad ka dei ruh ka jait khñiang kaba mih bha haka them Ri-Bhoi khamtam haki bynta jong ka khlaw Iewsier, Saiden bad ki thaiñ Lailad bad kiwei kiwei bad da ka jingmih jong katei ka khñiang khamtam ha kine ki bnai la sakhi ruh ba ki khlaw ki btap ki khihwin ki shngaiñ, ryngkat ka risa ka kynhoi bad dap da ki paidbah kiba leit ban kem ïaki naka bynta ban bam namar kadei ruh kawei naki jait jingbam kaba bang bad shngiam ban bam khamtam ki Bhoi.
Kitei ki jait khñiang ki mih ruh napoh khyndew haka por mynmiet haki khlaw bad par suki suki haki tnad dieng lane ki siej kiba don hapoh khyndew bad sdang ruh ban pait hadien ba kala kiew halor bad mih da kawei pat ka dur kaba lung napoh jong ka kmie kaba pynsah pat tang ka shynrong, bad dei ha kum katei ka por ba ka dang pait bad mih lung, ki paidbah ki ju smat ban leit tam da kaba pynkhreh ruh ïaki tum ki tam naduh ka por janmiet, ki ktang ban thep ryngkat u dieng ban dung pynïap ïaki shuwa ba kin heh bad her namar tang haki minit katei ka jait khñiang ka lah ban heh ban san ban mih sner biang ban her sha suiñ.
Ki paidbah na kylleng ki shnong kiba ju sngewtynnad ban bam ïa katei ka jait khñiang ha kum kane ka por ki ïa mih nala ki jong ki iing ki sem haka por janmiet bad tang mar ïa kem dum la iohi ba ki khlaw ki btap kila sdang shngaiñ ryngkat ki jingshai ki dongmusa, ki torch light la kat ka iew ryngkat ka jingkiw kiw kaw kaw ki paidbah kiba muja ban tam ïaki, kiba sa leit phai pat sha la ki jong ki iing ki sem haka por mynstep shuwa ban kynjatshai hadien bala dap ki ktang kiba ki rah.
Haba ioh ruh ban ïakren bad katto katne ki paidbah kiba smat ban leit kem ïa kitei ki jait khñiang kila pynpaw ba ka long shisha kaba muja ban rung sha ki khlaw ki btap bad shngaiñ da ki paidbah bad ki jingshai ba lah ban iohi na uwei u lum sha uwei pat kum ki ñiangbading namar ki jingshai ba rah da ki paidbah ha kaba kim sngewthuh ïaka jingthaid ka jingjrem haba ki leit ban kem ïa kitei ki jait khñiang bad ka pynkmen ïaka mynsiem jong ki ban wanphai pat sha la ki jong ki iing ki sem haka por kynjatshai.
Bun naki paidbah kiba ioh ban tam bun ïa kitei ki jait khñiang ka long ruh shibynta kum ka kamai ïaki ba ki lah pat ban leit die sha ki iew ki hat haka por mynstep haka dor kaba rem kaba haduh T.600/- haduh T.700/- shi kilo.
