Kum ka Timesquare ha America yn pynkylla dur ïa ka Them-ïewmawlong, ong u Bah Prestone

Shillong, Nohprah 07 : U Symbud Myntri Rangbah ka Jylla, Bah Prestone Tynsong u la ong ba ka dei ka thong bad ka jingangnud jong ka sorkar jylla ban pynkylla dur thymmai ïa ka Them-iewmawlong sha ka Timesquare jong ka America hadien ba ki la lah ban pyndep ïa ka ishu pynkynriah jaka.
“Ngi sahnud, don sa kawei ka jingeh hapdeng sor Shillong, kata ka long ka jingangnud jongngi ban weng ban pynkynriah noh ïa ka Them-iewmawlong,” u la ong haba kren ha kawei na ki jingïalang.
Shuh shuh u Symbud Myntri Rangbah u la bynrap ruh da kaba ong, “Ka por kan poi bad kan sa jia ba ka Them-Iewmawlong kan kylla long kum ka Timesquare ha America bad ka por kan sa poi.”
Da kaba kyntu ïa ki paidbah ba kim dei ban shah ïalam bakla ha kiba bun ki jingpyrshang ban ïalam bakla halor katei ka mat khamtam ha kane ka juk social media.
Nalorkata, u Bah Prestone u la pynkynmaw ruh ba ka ishu jong ka hotel ba pawnam mynta kaba don ha Khyndailad ba tip kum ka Vivanta ka dei ka jingtei kaba la sahteng bad sah khongreng khlem lah pyndep da ki phew phew snem hynrei u la ong ba dei ha kane ka sorkar kaba la lah ban pyndep pura bad pynkylla dur ïa ka.
Ha kajuh ka por u kyntu ruh ïa ki paidbah ba kin buh lang ki jingduwai na ka bynta ki nongïalam jong ka sorkar jylla khnang ba kin lah ban pyndep bun bha ki kam kiba ïadei na ka bynta ka roi ka pa jong ka jylla.