Kum ka ‘skywalk’ ha ri phareng thaiñ u rangbah da ki diengjri ha ka shnong Siej, ïap biej u CM bad ki Minister

Shillong, K’Lyngkot 11 : Ha kiwei ki ri jong ka pyrthei ïa ki ‘skywalk’ lane ki jaka ïaid kai pyngad ha suiñ la ju siang da ki iit lane da ki kynja nar na shilliang sha shilliang hynrei ka long kaba i phylla ban ïohi ba ha ka sien kaba nyngkong ba ïa kum kitei ki jaka ïaid kai pyngad la shna tang da kaba shu thaiñ bad pynskhem da ki thied dieng lane kita ki diengjri ba ju tip paidbah.
Kane ka jaka ïaid kai pyngad ha suiñ ne skywalk ka don ha ka shnong Siej, kawei na ki nongrit kaba don markhap bad ka shnong Laitkynsew kaba hap ha Shella Bhologanj Block, East Khasi Hills.
Ïa kane ka jingkieng suin ba shna da ki diengjri la paw pyrthei da ka jingleit jurip hi u Myntri Rangbah ka Jylla Conrad K Sangma ryngkat ki Myntri Sorkar kynthup naduh ka Myntri ka Koit ka Khiah, Dr. Ampareen Lyngdoh, Myntri ka tnad PHE Marcuise N Marak nangta u Chief Secretary ka jylla Bah DP Wahlang nalor kiwei ki heh sorkar, ki bor distrik bad ki nongïalam shnong.
Kane ka jingleit jurip kadei hadien shisngi ba ka sorkar ka la pynlong ïa ka jingïalang ba nyngkong eh jong ka Kynhun Myntri ha Sohra kaba la long ha kane ka sngi Thohdieng.
Ïa kane ka jingkieng suiñ kaba dang bteng ban thaiñ bad shna haduh mynta la pynwandur da u Bah Hally War, 68 snem hadien ba u la dep ban pynwandur shwa ïa ka jingkieng jri kaba nyngkong hangtei hi kaba la pynpur na shilliang sha shilliang ka wah ïa kaba la tip mynta kum ka Umkar Living Root Bridge.
Ha ka jingïakren bad u Myntri Rangbah, u Bah Hally ba dei ruh u Rangbah Shnong bad kumjuh u Sordar ka Elaka Nongkroh Bah Macdonald Khyllep, u Bah Hally u la ïathuh ba ïa katei ka jingkieng jri u la sdang ban pynwandur bad thain naduh ka por ba u dang don 10 snem mynshwa bad mynta ka la ïaid kumba 50 snem ei ei.
Haba ïadei bad katei ka jingkieng suin pat u la ïathuh ba kane kan shim por sa kumba 10 – 12 snem ei ei haduh ba kin da lah ban pynkhlain bha pura kumba logn lem kiwei kiwei ki jingkieng jri.
Kane ka skywalk kaba dang bteng ban thain bad pynkhlaiñ ïa ki jaka iaid haduh mynta kadei kabaa sdang ban pynwandur da u Bah Hally War naduh ki snem 1972 ne kumba 50 snem ei ei mynshwa.
Haba jubab halor ka jingkylli jong u Myntri Rangbah, u Bah Hally uba la bat ruh kum u Rangbah Shnong la kumba 40 snem ei ei, u la ïathuh ba ka jingsdang jong u ban thain ïa ka jingkieng jri ka dei malu mala ha ka por ba u dang dap 10 snem ei ei hadien ba u ïohi ba ki paidbah ki shem shitom bha ban kam na shilliang sha shilliang ka wah ha ka por lyiur ba heh um.”
Kumta hadien ba u la ïoh sngew markhmat ïa ka jingeh bad ki mat jingdawa kiba bun ba ki nongïalam shnong ki pynpaw, na ka liang u Myntri Rangbah u la pynbna ruh ba un sa phah maramot noh ïa ka surok ban poi sha katei ka shnong, nangta ban phah pynbha noh ïa ka iing skul bad khamtam wat ban phah peit bniah wat ïa ki surok ba ka shnong ka kwah ban pynpoi sha ki lyngkha rep.
Haba kren bad ki lad pathai khubor hadien ba la mih na kane ka jaka, u Myntri Rangbah u la ai ka burom ïa utei u rangbah uba la aiti lut met bad mynsiem bad pyndonkam hok ïa ka jingstad tynrai na ka bynta ban shna bad pynwandur ïa katei ka jingkieng suiñ.