Shillong, Rymphang 20: Ka Khasi Hills Autonomous District Council (KHADC) ha ka sngi khatduh jong ka dorbar mang tyngka kala pynkut lut ïa baroh ki kam ban ïa kren hapoh ka ïing dorbar, kum shi bynta ban burok ïa ka jingkhlad noh kyndit u MP ka Shillong u Bah Ricky AJ Syngkon.
Kum ban shu kdew, u Bah Ricky A.J Syngkong u la khlad noh kyndit kyndit ha ka janmiet jong ka sngi Palei ha ka jaka ai jingsumar ha Robert Hospital.
Ha shwa ban sdang ka dorbar, u nongïalam ka liang pyrshah uba dei ruh u MDC jong ka Sohra u Bah Titos W Chyne u la ïeng bad pynpaw ba hynnin ka janmiet kadei ka sngi ba sngewsih ïa ka jylla Meghalaya namar ka jingkhlad noh u MP ka Lok Sabha jong ka 1 Shillong Constituency u Dr Ricky AJ Syngkong.
“Kum ka dak jong ka jingkynmaw burom ïa ka jingduh noh ïa u Dr Ricky uba dei u MP to ngin suspend noh ïa baroh ki kam ha kane ka dorbar mang tyngka hynrei to ngin shu pyndep tang ïa ka Vote on Account bad ban mynjur ïa ki Bill” ong u Bah Titos.
Na ka liang u Symbud Lamphang jong ka ïing dorbar thaw ain ha KHADC u la bthah ïa baroh ki dkhot jong ka ïing ba kin ïa ïeng ban pynlong ka jingsngap jar kaba shim init kum ka dak ban pynpaw ïa ka jingburom halor ka jingkhlad noh u Bah Ricky AJ Syngkon uba dei u MP ka Shillong.
