Shillong, Jylliew 05 : U Myntri ka tnad Tourism ka sorkar jylla Bah Paul Lyngdoh u la ong ba ka sorkar ka la rai ban wanrah da ki cable car kiba long thik kum ha Switzerland kaba ki nongwan jngohkai pyrthei kin ïoh ban peit na kitei ki kali suiñ ïa ka jingitynnad ka mariang ha nongbah Shillong.
Haba kren bad ki lad pathai khubor, u Bah Paul Lyngdoh u la ïathuh ba ïa katei ka sienjam la dep ban ïa kren ha ka jingleit jong u dang shen sha Switzerland kawei na ki ri kaba pawnam ha ka jingpyndonkam ïa ki cable car ban khring ïa ki nongwan jngohkai.
“Ka jingthmu jong kane ka jingleit jngoh ïa ka Switzerland ka long ban pynstet ïa ka jingsdang pyntreikam noh ïa ka Shillong Ropeway project kaba la mang 140 klur tyngka da ka jingbei tyngka jong ka Asian Development Bank,” u la ong.
Da kaba kam ba katei ka projek kadei kawei na kiba heh tam ha ka thain shatei lammihmgi jong ka Ri, u Myntri u la ong ruh, ” Da ka jingbun ka jingwan ki nongjngohkai pyrthei ngi khmih lynti ruh ba kan dei kawei na ki lad aikam kaba heh tam na bynta ki nong Meghalaya.”
Haba pynshai pat halor ka jingkynthoh kiba ïadei bad ka ishu Reservation kaba lamkhmat da u president ka VPP da kaba shah thngan, na ka liang u Bah Paul u la ong, “Ngam lah ban shu pynsangeh noh ïa ki jingïalang ba la dep pynbeit (sha Switzerland) tang na ka daw ba don kiba shah thngan ha Shillong bad ban wanphai noh.”
Ha kajuh ka por u Myntri u la pyntip ruh ba katei ka projek kan sa sdang noh ha u Nailar bad l akhmih lynti ruh ba ha u Nohprah kin ïoh sdang noh ïa ka kam ïa kaba ki khmih lynti ar snem ban pyndep ïa ka.
