Kular u Sports Scientist ban kyrshan ïa ka jingïalehkai siat suloi ha Meghalaya

Munich, Jylliew 10 : Ka jingïakhun jong ka India ha ka ISSF Pistol & Rifle World Cup ha Munich ka la sdang da jingjop kaba sngewtynnad hadien ba ka Elavenil Valarivan, ha ka rta kaba 25 snem ka la ïoh ban khur ïa ka takma rnong ha ka lympung ïakob siat ba 10m air rifle ki kynthei ha ka sngi Ba-ar. Kane ka jingjop ka pyni ruh ïa ka jingïaid shaphrang jong ka hadien ba ka la wan ha ka kyrdan ba saw ha u snem 2018 ha kajuh ka jaka.
Halor kane, na ka liang u Bah John F Kharshiing, Vice President jong ka National Rifle Association of India (NRAI), u ai khublei bad u pynpaw ïa ka jingsngew sarong halor kane ka jingjop jong ka Elavenil.
U ong,“Ka jingjop jong ka Elavenil ka ai mynsiem bad ka pynmih ka jingsngewskhem ha ka kynhun India ha kane ka jingïalehkai kaba heh ha pyrthei.” Ha kane ka lympung ki don kumba 76 tylli ki Ri Ka pyrthei ki ïa shim bynta ha kane ka World Cup mynta ka kynti.
Shwa kane, u Bah John u la poi ban jngoh ïa ka Olympic Schießanlage, ka jaka ïalehkai ïa siat kaba la tei na ka bynta ka Olympic ha u snem 1972 ryngkat bad u Sports Scientist ba pawnam u Dr. Pierre Beauchamp, PhD, u High Performance Director (HPD) jong ka NRAI bad u nonghikai ba pawkhmat ha ka jingïalehkai ïa siat ha ka pyrthei. Ha ka 09tarik Jylliew ki la leit peit ïa ki jaka ïa siat 10m, 25m, 50m bad ka final hall, ha kaba ki la ïakren bad ki nongïalehkai, ki coach bad ki nongpynïaid Ka team India ban ïohi kumno ka jingïapynkhreh ki treikam bad ban pynshlur ïa ki samla.
Ka bynta kaba khraw ha kane ka jingleit jurip ka long ka jingshim lad ban ïoh ïa ka jingïakren kaba bniah hapdeng u Vice President National Rifle Association of India bad u Dr. Beauchamp halor ka jingpynkhreh na ka bynta ka 39th National Games 2027 kaba yn pynlong ha Meghalaya. La ïathuh ba halor kane, u Dr. Beauchamp u la pynpaw ïa ka jingkular ban kyrshan bad ai jingmut halor ka jingpynneh pynsah bad ka roi ka par jong ka jingïalehkai shooting ha Meghalaya bad ki bynta jong ka thaiñ Shatei Lam Mihngi, namar ka jingdon bun jong ki samla ba thrang ban ïalehkai bad u la ïaroh ruh ïa ka sap kaba ki don.
“U la kular ba ha ka jingïatreilang bad ka NRAI, un ai jingtip na ka jinglong nonghikai jong u bad ai jingmut kumno ban tei ïa ka kynhun kaba khlaiñ bad kaba lah ban ïakhun ha ka lympung National Games. U Dr. Beauchamp u la pynpaw ba ka long kaba jwat ban jop medal ha ki lympung World Cup bad khamtam ha ka Olympic,” ong u Bah John Kharshiing ha ka kyrwoh.
“Ban ïoh khur takma ha ka World Cup lane Olympic ka donkam ïa ka jingïai neh ka jingtrei shitom, ka jingsngewshlur bad ka jingïarap kaba biang. Ki nongïalehkai ki dei ban long kiba la pynkhreh na baroh ki lïang ban lah ban ïalehkai ha ka kyrdan national bad international,” u la ong.
Ha kane ka jingleit, u Vice President ka NRAI u Bah John F Kharshiing u la ïakynduh ruh ïa ka Manu Bhaker, ka nongïalehkai Olympic kaba la ïoh ban khur haduh ar tylli ki takma rnong ha ka Olympic ha Paris ha u snem 2024. “Ka Bhaker ka la pynpaw ka jingsngewkmen halor ka jingangnud ban tei noh ïa ka jaka ïa lehkai ïa siat (shooting range) ha Shillong, bad ka la kylli lano yn pyndep ban tei ïa kane ka jaka namar ba ka kwah ban pynlut por ha katei ka jaka ba itynnad ban ïai trei shitom na ka bynta ban pyntbit ïalade. Ka la kyntu ruh ïa ka Sorkar Meghalaya ba kan ai jingïarap ban tei ïa ka jaka jingïalehkai shooting kaban pynsngewtynnad bad pynsngewjuh ïa ki nongïalehkai, kumjuh kumba don ha Munich, Seoul bad kiwei ki jaka ha pyrthei.”
Kane ka long katkum ka kyrwoh ba la phah da u Bah John F Kharshiiing ba dei u Vice President, NRAI uba don mynta ha ka jingleit mihkhmat sha Munich, kaba ha Germany.