Shillong, Nailur 11: U Myntri Rangbah u Conrad K Sangma, ha ka sngi Balang u la ong ban pynkup burom ïa ki nongthoh khubor da ka jingkyrshan pisa kaba T. 1 lak sha ki 8 ngut ki lad pathai khubor kiba la rim ha ka jingïadonlang ka Dr. Mazel Ampareen Lyngdoh, ka myntri ka Information & Public Relations (DIPR), ha ka Meghalaya Media Meet 2025 ha Courtyard Marriott, Shillong.
Ba la pynlong ka tnat DIPR, ha ka jingïatreilang bad ka Centre for Policy, ha kane ka prorkam la donlang ki nongthaw aiñ, ki nongthoh khubor bad ki riew shemphang naka bynta ki jingai ki jingkren, ki workshop, bad ka jingithuh ïa ka excellence ha ka journalism.
Haba kren ha ka jingïalum lang ki lad pathai khubor, u Conrad K. Sangma, u la banjur halor ka bynta ka kynhun ki lad pathai khubor ha ka imlang sahlang. “Ki media kin ïaibat ïa ka bor kaba donkam,” u la ong, “bad ka kam thoh khubor kadei ka lynti ban ithuh ïa ki jingkitkhlieh.”
U la pynpaw ba ka sorkar ka angud ban kyrshan ïa ki lad pathai khubor lyngba ki welfare scheme, bad ban ai ka jingkyrshan kaba manla u bnai T. 10,000 sha ki senior journalists hapoh ka Meghalaya Journalists Welfare scheme, 2024. Pynbud ka jingtyrwa ban airap pisa haduh T. 35 lak.
U Sangma u la banjur ïa ka jingdonkam ban don structured media ecosystem, ban pyndonkam ïa ka media house ban register bad ka Department of Information and Public Relations (DIPR) na ka bynta ki jingithuh. U la kyrshan ban pynbha ïa ki sap ki buit bad kiwei kiwei.
Kane ka prokram kaba la ai ka theme, ‘From Print to Pixel: Navigating trust, technology, consumption & accountability’, ka la khmih halor ki workshop bad ban lap ki jingpyntip ba bakla.
Ki nongpathai khubor kiba don ha kane ka prokram ki dei BBC South Asia Bureau Chief, Jacky Martens; Padma Shri awardee bad Editor ka Shillong Times, Patricia Mukhim; Ahmer Khan; bad UNICEF India’s Chief of Communication, Zafrin Chowdhury, Dr. Madhulika Jonathan, Chief of Field Office, UNICEF Assam bad NE state bad kiwei kiwei.
Ha ki jingkren, ka Dr Mazel Ampareen Lyngdoh, Hon’ble myntri ka Information & Public Relations, ka la pynppaw da kaba ong ba kane ka theme ka biang bha ban ïohi ïa ki jingkiew ki media na ki kot khubor ba shon sah ka digital pixel era. Ka la ïaroh ïa ki nongthoh khubor kiiba la shah pynkup burom ha kane ka sngi.
Katba u Bah Donald P. Wahlang, IAS, Chief Secretary, u la banjur halor ka jingkongsan ka technology bad ka AI ha kine kipor ba mynta kiba long kongsan bha ha ki kam thoh khubor.
Ha ki rynsan ïasyllok, u Dr. Sampath Kumar, IAS, Development Commissioner and Principal Secretary, u la banjur ïa ka jingpynkylla ïa ki rukom treikam. U la ïaroh ïa ka jingdon bynta ki lad pathai khubor ban pynwandur ïa ki polisi.
