Jowai, Jymmang, 22: Mynta ka sngi ka Jaiñtia Students’ Union (JSU) Jowai Circle, hapoh ka jinglamkhmat u President Borntifulson Rupon ha ka jingsynrang lang u General Secretary Mewario bad u Finance Secretary u Wansalan Dame Patwet ki la ïoh ban ïa kynduh ïa u Myntri ka tnad P.H.E u Marcius N Marak ha ka jingïadei bad ka jingdawa ban maramot ïa ka surok Urkhla uba don ha Khimusniang Jowai.
Ha kane ka jingïakynduh na liang u Myntri ka PHE Marcuis Marak ula bynset ïa kam ha u Chief Engineer ban pynbiang bad pynshna noh ïa katei ka surok kaba la sniew jur la bun bun snem mynta. Kane ka surok ka dei kaba peit bad da ka tnad PHE bad ka poi shaduh sha ka jaka ba pynlang bad pynkhuid (Treatment plan) jong ka tnad P.H.E kaba don ha ka jaka ba la tip kum ka Urkhla ha shnong Khimusniang, Jowai.
Shuh shuh na ka liang jong u Myntri u la kular ïa ka seng ban maramot noh mardor ïa kane ka surok hadien ba la ïoh ka Sanction bad marsien kut ka aiom Lyiur.
Hadien ba la kynduh ïa u Myntri ka seng ka la pynpaw ïa ka jingsngewhun ïa ka jingshimkhia jong u Myntri uba la wan peit bad jurip dalade ïa kane ka surok. Na ka liang ka seng kan nang ïai bud dien ïa kane ka mat jingdawa kumba la kular da u Myntri ba dei peit ïa ka tnad PHE haduh ba kan da urlong.
Ha kane ka sngi la synran lang ïa u Myntri da u MLA ka Jowai u ma Wailadmiki Shylla, u Chief Engineer, PHE, u Superintending Engineer (PHE), Electrical Circle, Shillong, Executive Engineer (PHE), Electrical Division, Jowai, bad u Sub-Divisional Officer (PHE), Electrical Sub-Division, Jowai.
