Shillong, Nohprah 18 : U Myntri ka Tnad Pule Puthi u Ma Lahkmen Rymbui ula kular ba ka Sorkar Jylla kan shimkhia ban leh eiei ha ka ban pynbeit ïa ki jingeh kawei hadien kawei,haba buh hakhmat duh ïa ka bha ka miat ki Nonghikai, ki Samla pule bad ka kam pule puthi hi baroh kawei.
“Ngi la kular ban pynlait ïa ka scholarship shuwa ka Khristmas, bad ngi lah leh ïa kata. Ngi la ïapynbeit ruh ïa ki jingeh ki ki Nonghikai Deficit bad ka jingsiew DA ruh yn sa pynbeit noh shen, lehse ha ka 19 tarik Nohprah” ong u Ma Lahkmen haba ïakren bad ki nongthoh khubor ha ka sngi Balang.
U Myntri ula pynpaw ruh ïa ka jingkut jingmut ban leh ei ei na ka bynta ki nonghikai SSA, Adhoc bad ki nonghikai Hindi, da kaba pynpaw ba ka Tnad ka dang pynkhreh ïa ka rukom siew ba thymmai bad yn sa pyntreikam noh shen ïa ka.
Halor ka kam ba ïadei bad ki Nonghikai bala don ha ka kam, u Bah Rymbui ula ong “Ngi la pyrshang ban leh ei ei halor kane. Ka hukum ka ïing Bishar Supreme Court ha ka 1 tarik Nailar kala pynlong kongsan ïa ka TET, hynrei ka NCTE kam lah ban pynkylla ïa ka rule. Ngi la thoh sha u Myntri ka Sorkar Pdeng ban pynkylla ïa ki kyndon ne policy ka NCTE ba kin pyllait noh ïa ki Nonghikai bala don ha ka kam, ïa kiba la thungkam hashuwa ka jingwan ka RTE Act.
Ula pynpaw ïa ka jingsngewkhia ba kane ka hukum ka lah ban pynduh kam ïa ki Nonghikai bad ban jur ba ka Sorkar ka dang pyrshang ban pynkohnguh ïa ka Sorkar Pdeng ba kan pynkylla ïa ki kyndon.
Halor ki kynrum kynram ka NEHU, kaba la ïaid mynta la palat shisnem, u Bah Rymbui ula ong “Ka jingsngap jar jong ka Sorkar Pdeng ka long kaba pynlyngngoh bha”.
“Kumno ngin pynbha ïa ka pule ka dangle lada ngim sngap ïa ki kynhun bapher bapher?” ula buh jingkylli.
