Nongpoh, Naitung, 29: Kum kawei na ki kynhun kaba ju ïarap ïa ki pra longkmie ban sengkam sengjam bad ban ieng hala ki jong ki kjat, ka Roi Bad San CLF Multipurpose Co-Operative Society, Mawhati Cluster ka la kynjoh sha u mawmer ba 3 snem ka jingïaid lynti naduh bala seng ïa ka ha u snem 2023.
Kum ka dak jong ka jingleh halor katei ka jingïaid lynti kaba 3 snem lynter ryngkat shibun ki kam ba katei ka society ka la shakri ha ka imlang ka sahlang khamtam ki para longkmie, ki la pynlong ruh da ka jinglehkmen ha ka 25 tarik mynta u bnai ha Umsohlait Parish Hall, ha kaba u MLA ka Mawhati u Bah Charles Marngar u la leit ban shim bynta kum u kongsan ha ka jingdonlang ki ophisar ka Umsning C&RD Block, ki ophisar na ka tnad PHE, ki nongïalam katei ka society ba kynthup ïa ka kong B Nongrum kum ka President bad ka kong A Sawkmie General Secretary lem bad ki longkmie na katei ka thaiñ.
Lyngba katei ka sngi lehkmen kum ka Society ka la ïoh ruh ban pyntip paidbah ïa shibun ki kam ba ka la leh ha ka jingïaid lynti kaba 3 snem khamtam ban kyrshan bad ai ka jingshakri ba radbah sha ki para longkmie lyngba ki Village Organisation bad ki Self-Help Group bapher bapher ba kin ieng hala ki jong ki kjat lyngba ki kam bapher bapher.
Haba kren ha ka jingïalang na ka liang u Bah Wallam Kharwanlang u ba dei u Block Development Manager jong ka NRLM, C&RD Block Umsning, u la ïathuh ba mynta ka la pynsuk shisha na ka bynta ban wanrah kham bun shuh shuh ki jingmyntoi sha ki longkmie kiba don hapoh ki VO, ki SHG bad ki Society bapher bapher, naduh ba la lah ïoh ïa ka Mawhati C&RD Block
Na ka liang u Bah Charles Marngar haba kren ha katei ka sngi u la pynpaw shisha ka jingsngewkmen kaba khraw halor ka jinglah ban pynurlong bad wanrah ïa ka Mawhati C&RD Block kaba ki paidbah ki la ap khmih lynti la slem bha bad ka la nang pynjan bad pynsuk ïa ka jingdonkam ki paidbah khamtam ha kaba ïadei bad ki skhim pynroi namar kumba long mynta ka sorkar ka la dep ruh ban mang pisa kumba 5 klur ban shna ïa ka ophis ba pura jong ka Mawhati C&RD Block.
Shuh shuh kum ka jingkyrshan bad ai mynsiem ïa ki longkmie hapoh ka kynhun jong ka Roi Bad San CLF Multipurpose Co-Operative Society, Mawhati Cluster na ka liang u MLA u la kular ruh ban pynïoh da ka ophis ba pura mynta u snem, khnang ba kin dang lah shuh shuh ban trei bha bad ban nang pyntyllun ïa ki kam ki jong jong ki.
