Kular u MLA ban maramot ïa ka surok, pynbiang motor bad jingker ïa ka tyllong um ha Umjajew

Shillong, Lber : U MLA ka Mawlai u Bah PT Sawkmie ha ka sngi ba Ar ba la lah u la mang na ka MLA Skhim (SRWP) na ka bynta ban shna ïa ka jingker ka ban ïada ïa ka tyllong um, ban maramot ïa ka surok, thied motor pump um bad ki pipe na ka bynta ka shnong Mawlai Umjajew.
ïa kane u MLA u la pyntip hadien ba u la pynlong ka jingleit jurip ïa ka tyllong um kumjuh ïa ka surok hapoh katei ka shnong, kumjuh hadien ba u la ïakren bad u rangbah shnong bah P. Majaw kumjuh bad u Secretary shnong u bah Jefferson Shabong ha ka jingïadon lang ki nongkitkam shnong.
Kane ka jingleit jurip jong u MLA ka la wan long ruh hadien ba na ka liang ki nongïalam shnong ki la pynpaw halor ka jingdonkam ïa u motor pump um bad ruh ban thied ïa ki pipe khnang ban lah ban pynpoi um ha ka top um ka ba don ha shnong ka ban sam pynbiang um pat ïa ka shnong Umjajew baroh kawei.
Na ka liang ki nongkitkam shnong ka Umjajew ki ïathuh ba ha kane ka tyllong um ki don ki briew ki ba ju wan shongkai ha ka por mynmiet bad ki pynjulor bad pynjaboh ïa ka tyllong um, kumta ki la pynpaw halor ka jingdonkam ban ker noh ïa kane ka jaka khnang ba kane ka tyllong um kan ym shah ktah.
Shuh shuh ha ka ba ïa dei bad kane, ka shnong Umjajew ka la pynpaw ruh ka jingsngewnguh ïa u MLA ka thaiñ u ba u la shimkhia ban pynurlong ïa kine ki jingangnud jong ka shnong bad u ba la ju ïa don ryngkat ruh ha ki ba bun ki bynta ki ba kum ka shnong ka donkam na ka por sha ka por.
Hashwa kane u MLA u la leit jurip ïa ka dong block 1, jong ka shnong Mawkynroh Umshing ha ka jingdon ryngkat u bah L. Diengdoh, secretary shnong bad rangbah dong na ka bynta ban buh pynbiang ïa ki solar light hapoh shnong.