Kular u MDC Narpuh ban pynïoh ïa ka jingkieng ïaid kjat ha Wah Lukha

Khliehriat, Rymphang, 04: Ka tamasa Lukha kaba ar sngi ba la pynlong da ka Sonapyrdi Tourism and Economic Development Society (STEDS) ka la kut noh ha ka sngi Saitjaiñ hapdeng ka jingiphuh iphieng.
Ha ka rynsan ïakob thei bhabriew ka samla Emohida Ymbon ka la rah ïa ka nam lah duh katba ka samla Dorachiva Daw ka la wan ba ar.
U MDC Narpuh Bah Emlangki Lamare haba kren kum u kongsan u la ong ba un pyrshang ban wad ïa ki lad ki lynti ban pynïoh ïa ka jingkieng ïaid kjat ha Wah Lukha khnang ban pynitynnad shuh shuh ïa kane ka jaka ba kan dup khring shuh shuh ïa ki nongjngoh kai pyrthei.
U Bah Lamare u la ai mynsiem ïa ki nongkitkam jong ka STEDS ba kim dei ban duh jingkyrmen haba ki don ka jingmut babha ban kyntiew ïa ka thaiñ ban pynbha bad pynitynnad shuh shuh ïa kane ka jaka ha Wah Lukha ban ïada ïa ka mariang sawdong.
“Ngan sa ïakren ha ka Committee jong ka District Mineral Fund (DMF) ban pynïoh ïa ka jingkieng ba itynnad ha kane ka jaka ban dup khring shuh shuh ïa ki nongwan jngohkai pyrthei. Nga kyntu ruh ïa ki nongkitkam jong ka STEDS ba kim dei ban shong klikti hynrei ma ki ruh kin pyrshang ban wad ïa ki lad ki lynti ban kyntiew ïa kane ka jaka ban pynlong ka jaka jngohkai pyrthei kaba paw ha ka thaiñ,” la ong u Bah Lamare
Haba kren shaphang ka jinglong jingman ka surokbah National Highway ha East Jaiñtia Hills District u Bah Lamare u la kyrpad ïa ka Sorkar Jylla ba kan shimkhia ban ïakren bha bad ka National Highway Authority of India (NHAI) ban maramot noh kham kloi ïa ka surok namarba sa tang katto katne bnai ka la poi biang ka aiom lyiur ka ban sa buh jingeh ïa ki paidbah nongleit nongwan namar ka jingsniew shaba palat ka surok ha ka thaiñ Narpuh.
U President barim ka STEDS, Bah Daïapherbha Lamare u la ong ba ka jingthmu jong ka Society ka long ban kyntiew ïa kane ka jaka ha Sonapyrdi kum kawei na ki jaka jngohkai pyrthei, ban ïada ïa ka khlaw Narpuh Wildlife Sanctuary bad ki sawdong sawkun
U la ong ruh ba watla ka Society ka don ka jingthmu kaba bha, hynrei kane ka Society kam pat shym la ïoh kano kano ka jingïarap na ka tnat Jngohkai Pyrthei ka Sorkar Jylla.
“Ngi khimlynti ba ha kine ki khyndiat bnai ki ban wan ngin sa ïoh ban buh ïa u mawnongrim ban shna ïa ka jingkieng ïaid kjat halor ka wah Lukha bad nga kyrpad ïa u Bah Emlangki Lamare ban un sngewbha ban shimkhia ban pynurlong ïa kane ka jingkieng,” ong u Bah Daïa.
U President jong ka STEDS Bah K.S.Suchiang bad u Secretary Bah Tackmon Gympad ki la pynshai bad batai ïa ki jingthmu jong ka Society ban kyntiew ïa ka thaiñ bad ban pynlong ïa kane ka jaka hajan ka wah Lukha bad ki sawdong sawkun kum kawei na ki jaka jngohkai pyrthei ka ban khring ïa ki briew kiba na jan bad na jngai.
Ha kane ka sngi, la sakhi lang da u Bah D.G.Malang uba la long kum u symbud kongsan.
La sam ruh ïa ki khusnam sha ki khynnah kiba jop ha ka jingïakob dro dur ba kynthup i hep rit Sweety Aroma Syiemlieh, Abeni Bamon bad i Gavriella.G.Suchen bad sha kiba jop ha ka jingïalehkai Beach Futsal ba la rah da ka Deiñchynrum A bad ka Deiñchynrum B ka la wan baar. La sam ruh ïa ki syrnot sha kiba ïashim bynta ha ka jingïaid kjat balai sngi lynter sha khlaw Narpuh Wildlife Sanctuary shaduh lum Bahbo Bahkong u Bah Shaniahskhem Dkhar na Wapungskur, u Bah Dapoibiang Bamon na Sutnga bad kiwei kiwei.
La pynshongshit ïa kane ka tamasa da ka jingrwai na ka kynhun Summersalt, DJ Fred bad DJ Meban.