Kular u DC ka West Jaiñtia Hills ban tuklar ïa ka jingshah pyndik ki paid Khappud ha ki BSF

Jowai, Nailur 20 : Ka Khasi Students’ Union (KSU) West Jaiñtia Hills District Unit hapoh ka jingïalam u samla Chanbor War uba dei u Vice President bad samla Leningrad Tariang General Secretary ha ryngkat ka jingïadonlang ki dkhot hynnin ka sngi 22.09.2022 kila leit ban ïakynduh ïa u bah B.S. Sohliya (IAS) Deputy Commissioner jong ka West Jaiñtia Hills District ha kamra treikam jong u ha Jowai.
Kane ka jingleit ïakynduh jong ka seng ka long ba halor ka jingïoh jingujor na kiba bun ki paidbah kiba shong ba sah haki thaiñ khappud bad ka Bangladesh kata naduh na Muktapur shaduh Dawki baki shipai Border Security Force (BSF) ki ju pyndik bad pynthut ïaka leit ka wan jong ki paidbah kane ka thaiñ la haba ki wan na ki ïew ki hat khamtam na ïew Amlarem, Dawki bunsien kitei ki shipai kila bat ïaki kali bad ki khynra ïaki mar ki mata ba ki thied na kine ki ïew nalor ba ki lah pynbiang ïaki cash memo na ki dukan ba ki thied bad ym dei tang katta kim kheiñ ruh ïaki ba pang ba shitom kiba mut ban leit shim dawai sha ki jaka ai jingsumar ki shu bat da ki kynta ban talasi ïa ki.
La ïathuh ba kane ka jingleh jong kine ki shipai ka pyn bitar ïaki paidbah jong ka thaiñ hi baroh kawei naba kine shipai ki nang ban pyndik tang ïaki briew trai jylla ka Ri, katba ïaki khar Bangladesh ki ïoh ban rung ban mih laitluid na Bangladesh sha India lyngba kine ki jaka, ‘lada ha jaka la jong ngim ïoh ban im ne ban ïaid laitluid sa haei pat ngin long laitluid ong ki paidbah jong ka thaiñ’ ong ka seng.
Halor kane ka seng ka la pynrem jur ïa kane ka jingleh jong kine ki shipai ki bym kheiñ shuh ïaki paidbah trai ri trai muluk bad ki bym kheiñ shuh ïaki kynthei khynnah kiba shong sha kane ka jaka.
Na ka liang u DC ha ka jingïakren bad kitei ki nongïalam ula kular ha khmat ka seng ba un tuklar noh mardor ïa kane ka kam bad um ailad ruh da lei lei ba kin shah pyndik ki para doh para snam lajong.
Ha kawei pat ka bynta ka seng kala dawa ruh na une u khlieh duh ka District ba dei ban weng noh mardor ia ka ktem jong kine ki shipai BSF kaba ki buh ha Amlarem hynrei ban phah pat ïa ki ban leit sha ki jaka khappud ban khanglad ïa ki briew kiba wan napoh Bangladesh. Pynkut ka kyrwoh na u samla L. Tariang General Secretary ka KSU West Jaintia Hills District Unit.