Nongstoiñ, Lber 26: Hadien ka jingbym sngewhun bad bym shai ïa ka jingbatai ka tnad MePDCL halor ka jingpoi shithi sha ki paidbah ban hap siew ïa ki bai thang bording, kaba la kot da ki phew hajar bad ki lak, na ka liang jong ka Seng HNYM, kaba la ïadon ryngkat lang bad ki paidbah halor katei ka kynrum kynram, mynta ka sngi ki la leit ban ïakynduh ïa u DC ka West Khasi Hills, u bah Garod LSN Dykes ban dawa phah sangeh shwa halor ka jingphah siew bai bording ka tnad MePDCL ïa ki paidbah.
Lah ban kdew hangne ba ha ka 25 tarik u Lber ki paidbah ka West Khasi Hills District, ha ryngkat ki dkhot jong ka Seng HNYM ki la tur sha ka ophis treikam jong ka tnad MePDCL kaba don ha Nongstoiñ, hadien ba ki la ïoh pdiang ïa ki shithi ba ki hap ban wan siew ïa ka bai thang bording kaba la kot da ki phew hajar bad da ki lak tynga.
Katkum kitei ki shithi ba la ïoh pdiang da ki paidbah na ka tnad MePDCL, la thoh ban wan siew ïa ka bai thang bording kaba dang sah bad ka skhim ban map ïa ka sut ba dang sah lyngba ka OTS skhim.
Kiba bun ki paidbah kiba ïoh pdiang ïa katei ka shithi ki dei kiba la dep shah ot ka bording ha katei ka tnad. Don ruh ki bym pat don tan bording ruh kiba la ïoh pdiang nalor kiwei kiba ju siew manla u bnai bad ka jingbitar ki paidbah, ka dei halor ka jingbym lah jong ka tnad ban ai ïa ka jingpynshai kaba tikna halor katei ka bai thang bording hynrei la shu ong ba kadei ka jingbthah ba kibor ba kham halor.
U President ka Seng HNYM haba ïakren sha ki lad pathai khubor hadien ka jingïakynduh ïa u DC, u la ong ba na ka liang jong u DC u la kren shai ba ha kaba ïadei bad ka jingdawa phah sangeh yn nym lah ban pynsangeh, hynrei hap ïaid beit shakhmat.
U la kular hakhmat ki dkhot ka Seng ba un sa thoh sha ka tnad MePDCL ba ym dei ban phah siew ar sien ïa ka bai thang bording ïa ki paidbah kiba siew manla u bnai, katba ïa ki long ïing ba ïoh pdiang ïa katei ka shithi khlem pat don ka ïing ne tan bording.
Ka dei kamram jong ka tnad bording ba kan peit bniah katba ïa kiba sah ram bad shah ot bording ka tnad ka dei ban pynshai sha ki longïing ba naduh mynno ki sah ram. Ha kajuh kapor u la ong ba u DC u kyntu ruh ïa ki paidbah ba kin buh jingkheiñ lang ban lah pynshisha haba ki siew bai bording manla u bnai.
Na ka liang jong ka Seng ka kyntu ïa ka tnad bording ba kan shimkhia ban pynbeit ïa kine ki kynrum kynram khnang ba kan nym buh jingeh ïa ka ophis bad khamtam ïa ki paibah kiba pyndonkam bording.
