Kular u CM ka Assam ban bthah ïa la ki Pulit ban nym pynkulmar ha khappud WKH : Conrad

Shillong, Jymmang 25:U Myntri Rangbah ka Jylla Conrad Kongkal Sangma hynne ka sngi balang ula ïathuh ba u Myntri Rangbah ka Jylla Assam Himanta Biswa Sarma, ula kular ban bthah noh mardor ïa ki Pulit ka Assam ba kin sangeh ïa ka jingpynibor ha khappud bad ka West Khasi Hills District khnang ban nym hehka jingkulmar.
U Conrad ula pyntip ïa kane halor ka jingjia kaba la jia ha Malang Huhapara, West Khasi Hills ha kaba ki Pulit ka Assam kila bom naphang da u lathi ïa ki nongshongshnong kiba ieng pyrshah ïa ka jingwankem ïa arngut ki nongshong shnong.
Ki Pulit ka Assam kila wan rung sha Malang Huhapara ban pynsangeh ïa kawei ka jingtei bad kila ktah lut ïa katto katne ki nongshongshnong ka Lalangkona Salbari.
U Conrad Sangma ula pyntip ba ula dep bthah ïa ki Pulit ba kin tohkit ïa kane ka jingjia bad ruh ba ula ïakren ïa kane ka kam bad u Myntri Rangbah ka Assam ha kaba la kynti ba u dei ban leh eiei khnang ba kum kine ki jingjia kim dei ban jia shuh hadien habud.
“Hynnin hi ka janmiet, nga la ïakren bad u Myntri Rangbah ka Assam bad ula kular ïa nga ba un sa ai ka jingbthah ïa u Superintendent of Police bad ki Pulit jong ka District ban pynthikna ba kum kine ki jingjia jingman kim dei ban nang jia biang” ula ong haba ïakren bad ki lad pathai khubor.
U Myntri Rangbah ka Jylla ula ban jur ïa ka jingdonkam ba baroh artylli ki Jylla ki dei ban phikir bha ha kaban tem ïa kum kine ki jingjia.
“Ngi donkam ban kiar. U (Himanta) ruh u don ka jingsngewkhia halor kane ka jingjia bad ula kular ha nga ba un leh eiei noh bad ban bthah ïala ki jong ki Pulit ba kin kiar na ka jingleit pynibor haba buh khmat ba ka jingïakren pyn beit pud ka dang ïaid shakhmat” ula ong.