Shillong, Jylliew 12 : U Myntri Rangbah ka Jylla, Conrad K Sangma u la kular ha khmat ki nongïalam jong ka A•chik Holistic Awakening Movement (AHAM) Central Executive Board ba un sa phah bishar biang ïa ka result thungkam Engineer.
Katkum ka kyrwoh la ong ba ïa katei, u Myntri u la kular ha khmat ki nongïalam ka AHAM ha ka jingkynduh ha iingsah jong u ha Tura.
Na ka liang ka AHAM Central Body hapoh ka jingïalam jong u President, u George Prince Momin halor ka jingbym burom ïa ka bhah thungkam thungjam da ka Meghalaya State Watershed & Wasteland Development Agency(MSWWDA) hadien ba tang uwei u samla Garo u la shah jied na bynta katei ka kam Field Engineer na ki 16 tylli ki kam kiba thylli.
“Na ka liang u Myntri Rangbah u la kular ha khmat ka Seng ba un sa phah bishar biang ïa katei ka result kam Engineer bad ba ïa katei ka kam yn sa ïa kren bad ki bor ba dei peit khnang ba kum katei ka jingjia kan ym jia shuh hadien,” ong ka kyrwoh.
Ha kane ka jingïakynduh ka kynhun ka la aiti ruh ïa ka dorkhas ban pynkynmaw ïa u Myntri Rangbah halor bun kiwei pat ki mat jingdawa.
