Nongpoh, Naiwieng 21: U Myntri Rangbah ka jylla, u Conrad K. Sangma, mynta ka sngi dalade hi u la leit ban iuhkjat ha Madan Umsning Sports & Cultural Club (US&CC) kaba don ha Umsning Patarim, ban sngap ïa ki jingdonkam jong ki paidbah bad ka shnong lyngba ka Sports Club, khamtam eh halor ka jingangnud ban ioh noh ïa ka madan kaba paka ha katei ka jaka.
U President ka Umsning Sports & Cultural Club, u Bah Rostarson Kylla, u la pynpaw ba ka Club la bun bun sien kala leit ud sha ka sorkar lyngba ka tnad ïalehkai, ban kyrpad ba kin ai jingïarap ban pynioh noh ïa ka madan kaba bit ba biang. Hynrei, watla shibun ki jingkular, haduh mynta ym pat don kano kano ka jingïarap na ka liang ka sorkar na ka bynta katei ka madan.
Haba kren u Myntri Rangbah, u Conrad Sangma, u la ai ka jingkular ba un shimti hi da lade ban peitngor bad ban sdang noh ïa ki kam pynbha ha katei ka madan. U la ong ba kane ka madan ka dei kaba donkam shisha bad yn pyrshang ban sdang shwa da ki bynta kiba kongsan kum ka jingker jingda, ka VIP Gallery bad ka jingpynbha ïa ka madan hi baroh kawei. U la kular ruh ba un trei shitom ban pynurlong ïa ka jingangnud jong ki paidbah bad ka Sports Club.
Ha katei ka jingleit peit ïa ka madan, la don ryngkat u Bah Sosthenes Sohtun, myntri ka tnad C&RD, u Dr. Celestine Lyngdoh, MLA Umsning, u Damanbait Lamare, MLA Umroi, u Bah Charles Marngar, MLA Mawhati, ka Kong Rona Khymdeit, MDC Nongpoh, ki ophisar sorkar bad ki nongïalam ka Club, kiba kynthup ïa u Bah Eric Benjamin Mawlong kum u Secretary lem bad ki dkhot na Umsning.
Ha ki jingkren jong u Bah Sosthenes Sohtun bad u Dr. Celestine Lyngdoh, ki la pynskhem bad pynshlur shuh shuh ïa ka jingdonkam ban pynbha ïa ka madan ha Umsning Patarim, da kaba ki kdew ruh ba kane ka madan ka long ka jaka ialehkai kaba heh kaba ju pynlong ïa ki lympung bapher bapher, bad kumta ka dei ban long kaba paka na ka bynta ka bha ka miat ki khun samla bad ka shnong ka thaw.
