Shillong, Nailar 04 : U Myntri Rangbah ka jylla ha ka sngi Palei u la kular ba kan don ka jingshngaiñ ïa ki nongïalam jong ka kynhun kieng atïohr jong ka HNLC ha ka jingwan jong ki ban wan kren ïa suk.
“Nga kwah ban pyntikna ïa ki bad ïa baroh ba kadei ka kamram jong ka sorkar jylla ban pyntikna ïa ka jingshngaiñ jong uwei pa uwei bad ruh ïa baroh kiba wan sha ka jingïakren,” ong u Myntri Rangbah haba kren bad ki lad pathai khubor hadien ka jingïalang kaba long ha ophis treikam jong ka NPP.
Katei jingkren jong u Myntri Rangbah kadei hadien ba ka HNLC ka la pynpaw bad kyntu ïa ka sorkar jylla ban pyntikna ba kan don ka jingshngaiñ bad ka jingïada ïa ki nongïalam jong ka kiba wan sha jingïakren ïa suk khamtam eh lada jia ba ka jingïakren kam long kaba seisoh.
Da kaba pynpaw ba katei ka jingïakren kan sa long noh shen, u Myntri Rangbah u la ong ruh ba ka jingpynkhreh naka bynta katei ka kam ka la ïaid mynta la bun bun bnai bha bad kumta na ka liang jong ki ruh ki don ka jingkyrmen ba kan long kaba seisoh.
Kumban shu kdew hangne, katei ka kynhun kieng atiar ha kane ka sngi Balang ka la thung ïa u Vice Chairman jong ka kumjuh u Foreign Secretary ban leit shim bynta ha ka jingïakren ïa suk kaban sa long shen hapdeng ka HNLC, ka sorkar jylla bad ruh ka sorkar pdeng.
