Shillong, Jymmang: U Myntri ba khmih ïa ka tnat ka koit ka khiah bad ïa ka tnad khlaw (Forest) ha ka jylla, u James Sangma hynne ka sngi u la kular hakhmat u MDC ka Mawlai constituency u Bah Teibor Pathaw ba un shimkhia ban pynïoh ïa ka madan basketball na ka bynta ka shnong Mawlai Phudmuri bad kumjuh na ka bynta ban pynkynriah noh ïa ka NEHRU Dispensary kaba don ha Mawlai Nonglum sha kawei pat ka jaka.
Na ka liang u Bah Teiborlang Pathaw u la pynpaw ba la bun snem bha ba ka shnong Mawlai Phudmuri ka la thrang ban ïoh noh la ka jong ka Basketball Court ha ka jaka jong ka Forest department ha kaba mynta ka don ka Health Park.
Ha ka ba ïa dei bad kane ka madan ïalehkai basketball u Bah Teiborlang Pathaw u la pynpaw ba u la ïai pynkynmaw sha u James Sangma bad hynne ka sngi u la poi ban ïuh kjat ha Phudmuri ban bishar da la ki jong ki khmat bad ban sngewthuh khambha ïa kane ka jing angnud jong ka shnong.
Na ka liang u James Sangma ula ong “Dashisha ngan shimkhia haba ïa dei bad kane bad ngan sa ïakren bad ka ophis jong u Principal Chief Conservator of Forests (PCCF). Nga sngewkhia bha ba ki samla ka Mawlai ki kwah ban don ïa la ka jong ka madan kaba kin ïoh ban pynlut por kaban pynmyntoi bha ïa ki. Ha ka juh ka por ka komiti shnong jong ka Mawlai Phudmuri hapoh ka jingialam jong u actiong rangbah shnong bah S. Khongkliem ka la kyrpad ïa u myntri sorkar u James Sangma ba un ai jingbit naka bynta kane ka jaka.
Ha kane ka juh ka sngi u MDC bad u James ki la leit sa sha ka shnong Mawlai Nonglum na ka bynta ban pynkynriah ïa ka NEHRU Dispensary kaba don mynta hajan iew Nonglum (namar kane ka dei ka ïing ki briew ba shu wai tang arsnem), hynrei namar bun ki daw ka sorkar kam shym la lah ban pynkynriah haduh mynta.
Halor kane u myntri ka koit ka khiah u la ong “Nga kular sha phi bad ngi kyrmen ba yn lah ban pynkynriah noh kham kloi ïa ka.Na ka liang u bah Teiborlang Pathaw u la pynpaw ba un ïai budien ïa kane haduh ba kan da urlong.
