Nongstoiñ, Naitung 5: Ki heh ka tnad PWD kynthup naduh u Bah Ezekiel Lyngdoh Superintendent Engineer ka tnad PWD ryngkat u bah Fabian Umdor Executive Engineer jong ka National Highway, ba la synran lang da ki nongtrei jong ki ophis jong ki, ki la jurip bad ban ïakynduh ïa ki sordar jong ki shnong bapher bapher ka Sohpian ban pynshai ha ki ha kaba ïadei bad katei ka surok. Ki la kular ruh hakhmat kiba la sakhi lang ha kane ka jingjurip, ba ka tnad hi kan shim ka jingkitkhlieh bad ban leh ïa kaba donkam kumba dei ban long.
Lah ban pynkynmaw ba naduh ba ka jingmaramot bad siang rong biang ïa ka surok Nongstoiñ-Sohpian kaba jngai kumba hynñiew kilomitar la lah ban pyndep, ki paitbah kim shym la hun satia bad ki la mih shibun ki jingkynthoh. Ym tang na ki paitbah bad ki nongñiah kali hynrei wat na ka liang ki sordar jong ki hynñiew tylli ki shnong kiba don harud katei ka surok kum ka Sohpian, Domkohsam, Sylleiïawkheiñ, Porsohsat, Nongritong, Pyndenglawar, Mawrokporsohsat bad kiwei kiwei ki la ther tyngeh halro ka jingleh torti u kontraktor.
Nalor kata na ka liang ki sengbhalang ruh kim shym la sngap jar, hynrei ha ryngkat ka jingïatreilang bad ki sordar jong kitei ki shnong, ki la hiar la bunsien bun wat ban jurip bad ban thew ban woh ïa katei ka surok. Lyngba ka jinghiar jong ki ban thew ïa katei ka surok, la lap ba ki don shibun ki jingduna. kumta na ka liang ki sordar shnong ki la phah da ka jingthoh sha ki heh sorkar kiba dei peit ïa ka tnad PWD.
Hynne ka sngi hadien ba ki la dep wan jurip, kitei ki heh sorkar ki la pynshai ha ki sordar shnong ba ka jingmaramot bad siang rong ïa katei ka surok, kam dei satia ka skhim ban pynheh ïa ka surok, hynrei ka dei ka skhim kaba ka sorkar ka la mang pisa ban pynbha bad siang rong tang katkum ka jingheh jong ka surok ka barim.
U SE u la pynshai ruh ha ki sordar ba ha ki snem ba la dep na ka liang ka ophis ka la dep phah ïa ka proposal sha ka sorkar pdeng, ba kan mang pisa na ka bynta ban pynheh ïa katei ka surok, hynrei kam pdiang satia bad ka la mang pisa ban siang rong tang na ka bynta ka surok kaba rim. Katei ka jingpynshai jong ki heh ka PWD ka la pynhun mynsiem ïa ki sordar jong kitei ki hynñew tylli ki shnong, namar na ka liang jong ki, ki la kular ba ïa ki bynta ki bym pat biang kin sa bthah ïa u kontraktor ba un pynbiang.
Na ka liang ki sordar ki la kyrpad ruh ïa kitei ki heh sorkar, ba kin phah pynbha ruh ïa ki nur um kiba don ha ki lad jong ki surok shnong ha kaba u SE u la kular ba ïa ki jaka bym biang un sa shna da ka skhim ba kyrpang na ka bynta ban pynbiang kat kum ka jinglong jong ka jaka.
Hadien ka jingpynshai jong kitei ki heh sorkar bah S.Wahlang sordar jong ka shnong Sohpian haba ïakren bad ki nongthoh khubor, u la ong ba ha kaba ïadei bad katei ka surok na ka liang jong ki paitbah kin sngewbha ban hun ïa kaei kaba kitei ki heh sorkar ki la pynshai. Lada kim hun kin sngewbha ban da wan bniah ïa ki jinghsisha na ka ophis bad kim dei ban shu kynthoh lada kim tip ïa ka jingshisha.
