Kular ka NTA ban buh ïa ki CUET exam Centre ha baroh ki District ka Jylla

Shillong, Ïaiong 21: Ka National Testing Agency (NTA) kala kular ban sa buh ïa ki Exam Centre ha baroh ki District Headquarter jong ka Jylla ban pynlong ïa ka eksamin Common University Entrance Test (CUET), ka ban long ha u bnai Naitung.
Ïa kane la pyntip da u Myntri ka Tnad Pule Puthi ma Lahkmen Rymbui hynne ka sngi palei hadien ka jingïalang bad ki borkhmih ka North Eastern Hill University (NEHU) lem bad ki Principal jong ki College bapher bapher kaba iatai kumno ban pynïaid beit ïaid ryntih ïa ka CUET hapoh ka Jylla.
Ka Univerity Grant Commission (UGC) kala wanrah ïa ka CUET na ka bynta ban pynrung klas ïa ki samla ba pule ha ka kyrdan Under Graduate (UG) ha baroh ki College ba pyniasoh bad ki Central University na ka bynta ka samoi 2022-23.
Ka CUET ka dei ka rynsan ka ban plie lad kumjuh ïa baroh ki samla pule hapoh ka Jylla, khamtam ïa kito kiba na wan ki jaka nongkyndong ba kin ïoh ka lad ban leit pule ha ki University. Tang kane kawei ka eksam kan plie lynti ïa ki samla pule ba kin ïoh rung klas ha kano kano ka Central University hapoh ka Ri.
Haba pyntip ba ka CUET ka dei ka jingleh test da ki kor komputer, u Myntri ula ong ba ka Jylla Meghalaya kam don satia ïa ki kor ki bor ban pynlong ïa kane ka test bad ïa mynta, ka don tang kawei ka Centre ha Qualapatty,Shillong na ka bynta ka Jylla baroh kawei.
“Nga la pynpaw ïa ki jingeh ba mad da ka Jylla ban pynlong ïa ka CUET naba ka NTA kala ithuh tang artylli ki Centre-kawei ha Shillong bad kawei ha Ri-Bhoi District. Kin leh kumno kiwei pat ki District ka Jylla” ula ong.
U Myntri u pyntip ba u Additional Chief Secretary ba khmih ïa ka Tnad Pule Puthi ula hiar sha Nongbah Delhi bad ïakynduh ïa ki Heh Ophisar ka NTA ban pynpaw ïa kane ka jingeh jong ka Jylla.
“Ka NTA kala ai ka jingkular ba kan sa buh ïa ki Centre ha baroh ki District Head Quarter jong ka Jylla” ula ong haba kyntu ïa ki samla pule kiba dang kwah ban leit pule Under Graduate ba kin applai ïa ka CUET lyngba ka website jong ka NTA ka ban sa plie paidbah naduh ka 6 tarik u Jymmang.
Haba kylli, u ma Lahkmen ula ong “Ka NTA kala pynbna ba ka eksam CUET kan long la kumno kumno ruh ha ka taiew ba-ar jong u bnai Naitung. Ka por kala nang ïaid hynrei ka Sorkar Jylla kan dang ïai bteng ban ïakren bad ka Sorkar Pdeng ban lait na kane ka Test. Kumba long mynta hi, ka CUET ka dei tang ka lynti ban ïoh rung klas ha ka kyrdan pule Under Graduate ha ki College bapher bapher”.
U Myntri ula pyntip ba u Additional Chief Secretary ka Jylla ula buh ruh ka jingkyrpad ban nym pat pyntreikam ïa ka CUET hapoh ka Jylla Meghalaya na ka bynta une u snem ba mynta bad ong “Hynrei, ka UGC ka ieng skhem beit halor ka CUET bad kala kyntu ïa ka NTA ban buh ïa ki Centre ha kylleng ka Jylla ban pynlong ïa ka Entrance Test”.
U Myntri u pyntip ba ula bthah ruh ïa ki College bapher bapher ba kin iarap lem ha kaban pynsngewthuh ïa ki samla pule halor ka jingdonkam jong ka CUET bad kumno ban applai ha kaban ïoh ialeh ïa kane ka test.