Nongstoiñ, Jylliew 26: Ka kong Ampareen Lyngdoh myntri sorkar Meghalaya jong ka tnad ka koit ka khiah, ha ka sngi nyngkong jong ka taiew ka la hiar sha West Khasi Hills ban jurip ïa ki jaka sumar kiba don ha sor Nongstoiñ.
Ka myntri ka la leit ban jngoh ïa ka MCH Hospital kaba don ha Civil Hospital barim, ka TB hospital kaba don ha Nongstoiñ, ka Civil Hospital Nongstoiñ bad bad kiwei kiwei. Hadien kata katei ka myntri ka la ïoh ban pynlong ïa ka jingïakynduh lang bad ki ophisar sorkar bapher bapher kumjuh ruh bad ki sengbhalang jong ka thaiñ.
Ha katei ka sngi la ïadonlang ruh u bah Garod LSN Dykes Deputy Commissioner ka West Khasi Hills District, bah Gabriel Wahlang MDC/MLA ka Nongstoiñ konstitwensi, bah Methodios Dkhar MLA ka Mawchynrut konstitwensi, bah R.G Momin MLA ka Rambrai Jyrngam konstitwensi bad u bah Shakliar Warjri MLA ka Mawthadraishan konstitwensi bad kiwei kiwei.
Haba kren sha ki lad pathai khubor hadien ka jingïalang bad ki tnad sorkar bapher bapher, ka kong Ampareen Lyngdoh ka la ong, “Ia ki tiar jong ka MCH Hospital Nongstoiñ, la hap ban pynkynriah noh bad nang ai noh sha Mawkyrwat, namar ba la dep ban plie ïa ka Hospital ha Mawkyrwat bad ka duna ïa ki tiar ki tar”.
Ka la ong shuh shuh, “Sa kawei ruh ïa kine ki tiar la dep thied ha ki ar bad lai snem mynshwa. Kumta lada ïai buh sah hajuh khlem pyndonkam ki lah sniew bad sarang noh. Na ka bynta ka Nongstoiñ pat, ka sorkar ka la dep mang kyrpang da kiba thymmai bad hadien lai bnai, yn pynpoi noh”.
Haba kylli lano yn plie noh ïa ka MCH bad hato don ne em ka jingthmu ban pynbun shuh shuh ia ki jingthiah ha Civil Hospital ka la ong, “Kane ka kam ha MCH ka dang don ha ka jingïapynbeit. Hynrei ha kaba ïa dei bad ka Civil Hospital Nongstoiñ, nga la wan ban jurip, nga la ïohi bad sngewthuh ba don shibun ki jingdonkam kiba sorkar ka hap shimkhia. Hynrei, ïa kata pat ka dei ka kamram jong ki local MLA ba kin ïa tai sani bha bad ïa pynbeit ryngkat u DC bad kiwei kiwei. Hadien kata kin sa ai ka kaiphod sha nga”.
